Pas grabitjes së djeshme në aeroportin “Nënë Tereza” në Rinas, 10 punonjës të kompanive të sigurimit dhe administratorët e tyre, përgjegjës për ruajtjen, janë shoqëruar nga policia.
Ndalimet janë bërë nga policia e Tiranës dhe ajo e Krujës, e cila është në varësi të Durrësit, ndërsa njoftohet se janë shoqëruar edhe 16 persona të tjerë të skeduar si kontigjent i policisë që jetojnë apo punojnë në zonën përreth.
Ditën e sotme ka reaguar Partia Demokratike, e cila ka deklaruar se është cenuar rëndë siguria kombëtare e vendit, ndërsa i ka kërkuar Prokurorit të Përgjithshëm të kryejë një hetim të shpejtë e të plotë
“Partia Demokratike i kërkon Presidentit të Republikës të mbledhë Këshillin e Sigurisë Kombëtare, e të bëhet çdo analizë e të dalë çdo përgjegjësi për këtë krim të rëndë, që e ka nxjerrë vendin tonë të rrezikuar e të pasigurt, pikërisht në kohën e kërcënimeve të mëdha të terrorizmit”, – tha nënkryetari i PD-së Edi Paloka.
Ngjarja e djeshme sipas tij ishte dëshmi se Shqipëria dhe shqiptarët janë më të ekspozuar se kurrë dhe më të pambrojtur se asnjëherë më parë nga krimi dhe pasojat e tij. /tesheshi.com/
