Pas Gjermanisë e cila rivendosi kontrollet në kufirin me Austrinë, për shkak të fluksit të papërballueshëm të refugjatëve, edhe Austria pritet të nxjerrë ushtrinë në kufijtë e saj, duke i dhënë goditje dërrmuese lëvizjes së lirë në zonën Shengen.
Të dyja këto ndërmarrje të fundit të qeverisë gjermane e austriake shkojnë kundër parimeve të Shengenit, që lejon lëvizje të lirë midis vendeve europiane, edhe pse bëhet fjalë për ndërprerje të përkohshme.
Ndërkaq, Austria njoftoi se do të vendosë trupa për të ndihmuar me krizën e refugjatëve, ndërsa do të përforcojë kontrollet në kufirin me Hungarinë. Shtetet e Bashkimit Europian duket se po dorëzohen përballë fluksit gjithnjë në rritje të refugjatëve që ikin nga Siria dhe vende të tjera në luftë.
Pjesa më e madhe e refugjatëve kanë për destinacione Gjermaninë, e cila parashikon mbërritjen e 1 milion refugjatëve deri në fund të vitit.
BE, nga ana e saj, do të hedhë në votë planin për rishpërndarjen e 40 mijë azilkërkuesve nga Siria dhe Eritrea përmes vendosje së kuotave të detyrueshme, edhe pse shtetet e Europës Qendrore dhe Lindore kanë dalë kundër planit.
Kuotat do të ndajnë mes shteteve anëtare 160 mijë refugjatë.
Ndërkaq, në kaosin e përgjithshëm, Austria vendosi të nxjerrë ushtrinë në kufij, që në fillim do të marrë pjesë në pritjen e refugjatëve e më pas edhe do të ushtrojë kontrolle kufitare. “Nëse Gjermania ndërmerr kontrolle në kufij, edhe Austria duhet të përforcojë kufijtë e saj”, tha zëvendëskancelari austriak, Reinhold Mitterlehner. /tesheshi.com/
