Pas Europës, tani edhe SHBA, përkatësisht administrata “Trump” i ka kërkuar PD-së që të futet në zgjedhjet e 18 qershorit si rrugë e vetme për të ecur në partneritet, si dhe votimin e vVettingut.
Ka qenë N/Sekretari i Departamentit Amerikan të Shtetit, pra një figurë e lartë, përkatësisht numri 3 i tij, i cili ka lëshuar një deklaratë pasi është takuar në DASH me shefin e diplomacisë shqiptare, Ditmir Bushati.
Siç njofton Zëri i Amerikës, “Departamenti amerikan i Shtetit u bëri thirrje të gjitha partive politike në Shqipëri të marrin pjesë në zgjedhjet e ardhshme parlamentare”.
Në deklaratën e lëshuar sot në mëngjes, për të mbërritur sipas orës së Shqipërisë në Opinion, por e miratuar që mbrëmë, thuhet: “Nënsekretari amerikan i Shtetit për Çështjet Politike, Ambasador Thomas A. Shannon, u takua me ministrin e Jashtëm të Shqipërisë Ditmir Bushati, për të folur mbi interesat e përbashkëta në marrëdhëniet dypalëshe dhe në rajon”.
Më pas deklarata rimerr çështjen e Reformës në Drejtësi, duke rikthyer edhe njëherë çështjen me forcë te vettingu dhe tek pozicioni i SHBA.
“Nënsekretari Shannon, riafirmoi partneritetin e ngushtë midis Shteteve të Bashkuara dhe Shqipërisë, mbështetjen e fortë të SHBA ndaj përpjekjeve të Shqipërisë për reformën e gjyqësorit dhe angazhimin e përbashkët ndaj vlerave demokratike, sundimit të ligjit dhe respektimit të të drejtave të njeriut”.
Deklarata e Departamentit Amerikan erdhi pas një serie sulmesh ndaj ambasadorit Donald Lu, që sipas opozitës shprehte qëndrimin personal dhe jo atë të Uashingtonit. /tesheshi.com/
