Nard Ndoka, deputet i PD dhe kryetar i PDK-së, ka reaguar përmes një postimi në rrjetin social në lidhje me fjalimin e mbajtur sot nga Rigerta Loku, e cila përloti shqiptarët dhe të pranishmit në sallën e Kuvendit.
Por Ndoka shkruan se pavarësisht atyre që kërkon Rigerta, Edi Rama do të bëjë të tjera gjëra, sepse e ka mendjen te tepsia dhe timoni.
“Kristina nga Mirdita kërkon rrugë e ujë, por Rama kërkoi tepsi dhe timon!
Rigerta nga “La Sapienza” kërkon politika zhvillimi për fshatin, por Rama do të “rilindë” sheshet e fshatrave duke i shtruar me pllaka!
Tjetër kërkon Rigerta, tjetër ka bërë dhe do bëjë Rama!
Rigerta foli si agronome mirditore, jo si një politikane e “La Sapienze-s”! Duhej të vendoste gishtin në plagë, të ndante fajin, fajtorët, përgjegjësit, që reflektimi të jetë real, të ketë peshë dhe shpresë për të ndryshuar!
Dikush ka bërë pak, dikush më shumë e dikush aspak!
E nëse Rigerta e “La Sapienze-s” nuk e tha troç në Kuvend, bashkëfshatarët e saj përsëri do e shesin votën dhe ne si opozitarë e Rigerta si një “shpirt i lirë” do kërkojmë përsëri e përsëri rrugë e ujë; por Rama përsëri do mbjellë palma e shtrojë pllaka, madje do mburret, që bashkëfshatarët e Rigertës më kanë votuar mua për të qeverisur Rigertën dhe ju!
Ndaj Rigerta, duhej të godiste fort, si mirditore, por ajo foli si europiane në atë sallë, që nuk e meritonte atë delikatese romane të Rigertës!”, shkruan Ndoka në rrjetet sociale. /tesheshi.com/
