Reagime të ndryshme kanë pasur zyrtarët e partive në Kosovë pas daljes së exit-polleve të realizuara nga “Klan Kosova”. Ndërsa PDK, AAK dhe aleatët kanë shpallur fitoren dhe kanë ftuar për festë, sikundër edhe Vetëvendosje, LDK i ka quajtur të porositura sondazhet e para të paraqitura pas mbylljes së qendrave të votimit.
Kryetari i AAK-së, njëherësh i nominuari për kryeministër, Ramush Haradinaj thotë se koalicioni i tyre është fitues i këtyre zgjedhjeve.
“Fitorja është shumë më e thellë nga sa ka dalë nga exit-pollet. Urime zgjedhjet Kosovë, urime gjithëve”, ka thënë ai.
Ndërsa Dardan Sejdiu nga lëvizja “Vetëvendosje” ka thënë se janë subjekti i parë në vend, edhe pse përballë kishin një koalicion të madh. Ai ka thënë se qytetarët kanë votuar për ndryshimin dhe për një qeveri ndryshe ,të cilën do ta bëjë VV-ja.
“LVV është subjekti i parë në Republikën e Kosovës përballë një koalicioni të panikut, LVV del subjekti i parë dhe rezultatet na tregojnë se kemi deri në 33 për qind të votuesve. Është fitore e qytetarëve që e kanë dashur ndryshimin, është fitore e qytetarit të Republikës”, ka thënë ai.
Sejdiu ka thënë se vota e LVV-së është më shumë se e dyfishuar në këto zgjedhje.
“Vota e LVV-së është dyfish e rritur, qytetarët kanë votuar me zemër, kanë votuar Vetëvendosjen për ta përmbysur të keqen që e ka zënë këtë Republikë. Qytetarët e Republikës e mundësuan me vullnetin e tyre këtë ndryshim duke dyfishuar apo më shumë se dyfishuar LVV-në dhe këtë qeveri ndryshe do ta bëjë LVV-ja”, ka thënë ai.
Kurse kreu i LDK-së, Isa Mustafa në një konferencë për media e ka quajtur të pavërtetë sondazhin preliminar nga exit-pollet.
Ai ka thënë se LDK me partnerët do të dalë fitues i zgjedhjeve.
“Sondazhi është i pavërtetë, është përpjekje që të deformojë procesin zgjedhor. Konsiderojmë se kutitë e votimit janë sondazhi i vetëm dhe i qëndrueshëm i këtyre zgjedhjeve. Sondazhi është i porositur. I porosis aëntarët e LDK-së që të rrinë të qetë sepse rezultati do të jetë ndryshe. Qëllimi i sondazhit është të dekurajojë komisionarët dhe vëzhguesit. Ftojmë qytetarët dhe mediat që mos të bien pre e sondazhit. Po presim me qetësi dhe disponim rezultatin zgjedhor që do ta shpallë LDK-në me parnerët e saj si fitues të zgjedhjeve”, ka thënë Mustafa. /tesheshi.com/
