Presidenti i Partisë Popullore Europiane (PPE), Joseph Daul përmes dy shënimeve në rrjetin social Tëitter, shkruan se droga dhe krimi pengojnë rrugëtimin e Shqipërisë drejt Bashkimit Europian.
Një njohur si mik i hershëm i PD-së dhe ish-kryeministrit Sali Berisha Daul thekson se Shqipëria duhet të plotësojë katër kushte për t’u marrë seriozisht në përpjekjet e saj për anëtarësim në BE. Daul rendit sundimin e ligjit, drejtësinë e pavarur si dhe luftën kundër krimit të organizuar dhe korrupsionit.
“Aspirata e Shqipërisë për në BE do të merret seriozisht vetëm kur të sundojnë rregullat dhe ligji, drejtësia të jetë e pavarur si dhe të luftohet korrupsioni dhe krimi. Krimi dhe droga janë një problem i madh që pengojnë rrugën e Shqipërisë drejt BE. Përpjekjet e vërteta duhet të bëhen për t’i luftuar këto krime me transparencë të plotë”, thuhet në reagimin e Daul.
Daul drejton PPE-në, një grupim politik ky ku aderon edhe Partia Demokratike shqiptare.
Një ditë më parë një tjetër mike europiane e PD-së, politikania gjermane Doris Pack, doli me një qëndrim të ngjashëm. Të dy qëndrimet mbahen në kohën kur opozita ka ndërmarrë aksionin më të madh politik të saj që nga zgjedhjet e 25 qershorit duke akuzuar qeverinë Rama për mbrojtjen e ish-ministrit Tahiri që akuzohet për lidhje me trafikun e drogës nga Prokuroria e Krimeve të Rënda. /tesheshi.com/
