Manlio di Stefano, përfaqësues i Lëvizjes Pesë Yjet dhe anëtar i Komisionit të Politikës së Jashtme në Dhomën e Deputetëve të parlamentit italian, lajmëroi se parlamentarë italianë do ta vizitojnë Krimenë. Me fjalët e tij, vizita e tyre në tetor të këtij viti mund të jetë “një mundësi për të rivendosur lidhjen me Federatën Ruse.”
Parlamentari italian thumboi më pas qeverinë e vendit të tij kur u shpreh se, “Duke pasur interesat e italianëve në mendje, ne po shkojmë të vizitojmë Rusinë dhe Krimenë, për të bërë atë që nuk mund ta bëjë qeveria.”
Ai po ashtu shprehu dhe qëndrimin e Lëvizjes Pesë Yjet në lidhje me sanksionet ndaj Rusisë, duke u deklaruar kundër tyre. “Ne mendojmë për italianët, dhe marrëdhëniet me Rusinë kanë qenë gjithmonë të rëndësishme për ta.
Ne besojmë se Europa nuk mund të bëjë pa Rusinë.”
Delegacioni planifikon të shkojë në Krime nëpërmjet Rusisë, me synimin për ta parë nga afër gjendjen e popullatës pas referendumit të marsit të vitit 2014, që çoi në ribashkimin e Krimesë me Rusinë. Gatishmërinë për t’iu bashkuar delegacionit e ka shprehur dhe senatori Gergio Divina, i cili përfaqëson partinë Lega Nord.
Një vizitë të ngjashme ka paralajmëruar dhe kryetari i Komisionit të Punëve të Jashtme të parlamentit hungarez, Marton Gyongyosi.
Krimenë e vizituan javën e shkuar një numër deputetësh francezë, pavarësisht kundërshtive të qeverive ukrainase dhe franceze. Në Sevastopulin e aneksuar nga Rusia, drejtuesi i delegacionit francez, Thierry Mariani, deklaroi se ai do të luftonte kundër saksioneve të vëna Rusisë. “Shfaqje të mosrespektit për sovranitetin e Ukrainës dhe shkelje të rëndë të ligjit ukrainas,” e cilësuan këtë vizitë autoritetet ukrainase.
Ministria e Jashtme e Ukrainës ka reaguar nëpërmjet sekretares së shtypit, Marjana Betsa, e cila ka paralajmëruar një reagim të fortë të qeverisë të vendit të saj nëse vizitat zhvillohen. “Reagimi dhe pasojat do të jenë të garantuara po qe se vizitat do të kryhen,” bëri të qartë ajo. /tesheshi.com/
