Pas disa figurave qendrore të PD-së që kanë dalë kundër Lulzim Bashës për ven dimin e tij për të mos hyrë në zgjedhjet e 18 qershorit, kanë qenë dhe aleatët e vegjël që pas një mbështetjeje pa kushte, kanë kërkuar një qëndrim logjik nga kreu i opozitës.
Fatmir Mediu, i cili sot është parë duke pirë kafe me Sekretarin e Përgjithshëm të Kryeministrisë, Engjëll Agaçi, ka deklaruar se vendimi për bojkotin duhet të merret nga forumet e PD-së.
“Janë tre kolegë në Parlament që i vlerësoj, kanë një eksperiencë të madhe. Sigurisht, vendimmarja në politikë duhet të funksionojë përmes forumeve. Dhe është përgjegjësi e z.Basha që të ulet dhe të analizojë kush është vendimi më i drejtë.
Mbledhja e forumeve është domosdoshmëri dhe z.Basha uroj ta ketë bërë këtë ose duhet ta bëjë. E rëndësishme është pjesëmarrja në zgjedhje, por ne kemi ngritur shqetësimin se krimi i organizuar, korrupsioni cenojnë procesin. Ne jemi për një proces zgjedhor të lirë dhe të ndershëm”, u shpreh Mediu.
“Sa i takon votimit elektronik, ambasadori Lu na tha se është i pamundur, por ne kërkuam që opozitës t’i jepej e drejta për ta provuar, pra dy projekte pilot. Pra, ka pasur mungesë vullneti nga mazhoranca për të bërë reformë.
Ne kemi propozuar qeberi teknike me një mandat. Mazhoranca ka bërë një propozim me McAllister dhe Fleckenstein. Ajo çka ndodhi, duhet të ishte një histori që do të vijonte si nga PD dhe opozita ashtu edhe nga mazhoranca. Pra, të analizohej, nëse kemi lëshuar, lëshuam për interesin e qytetarëve, apo për t’u dukur mirë në sytë e ndërkombëtarëve”, thekson kreu i i republikanëve, një nga njerëzit më afër Bashës deri më tani në kauzën e çadrës. /tesheshi.com/
