Presidenti i Kosovës, Hashim Thaçi, ka hedhur akuza të forta në drejtim të partnerëve ndërkombëtarë, për disa premtime, që sipas tij, iu bënë në këmbim të krijimit të Gjykatës Speciales.
Thaçi, gjatë një fjalimi, ka kritikuar gjithashtu Gjykatën Speciale, duke thënë se kjo e fundit ka bashkëpunim maksimal dhe reciprok me Serbinë, ndërsa bashkëpunimi i saj me Kosovën është minimal, përkatësisht nuk ka bashkëpunim fare.
Por, akuzave të Thaçit i është përgjigjur Ambasada e Amerikës, duke treguar se Gjykata Speciale do të jetë e paanshme.
“Shtetet e Bashkuara mbesin tërësisht të përkushtuara për veprimin e suksesshëm të Dhomave të Specializuara të Kosovës në Hagë, dhe ne përshëndesim përkushtimin e institucioneve shtetërore për të bashkëpunuar me Gjykatën. Bashkëpunimi i Kosovës me këtë proçes do të forcojë pozitën ndërkombëtare të shtetit dhe do te jete tregues konkret i parimeve elementare demokratike ku sundimi i ligjit vlejnë për të gjithë qytetarët, njësoj”, thuhet në përgjigjen me shkrim të Ambasadës.
Në Ambasadën amerikane nuk kanë lënë pa e përmendur edhe anëtarësimin e Kosovës në mekanizmat ndërkombëtarë.
Në këtë aspekt, ata kanë bërë me dije se SHBA do të përkrahë Kosovën në çdo moment.
“Shtetet e Bashkuara përkrahin fuqishëm Kosovën ne anëtarësimin e saj në organizatat ndërkombëtare; anëtarësimi i se cilës bazohet në kritere specifike për çdo institucion dhe Qeveria e SHBA-ve do të vazhdojë të punojë nga afër me Kosovën që ajo t’i përmbushë ato kërkesa”, thuhet në deklaratë.
Presidenti Thaçi në një takim me shoqërinë civile, ku foli për Specialen, deklaroi se në bazë të disa hulumtimeve, ekzistojnë keqinformata, pritje joreale, dezinformata të qëllimshme për atë se çfarë është dhe çfarë do të sjellë Gjykata Speciale.
Thaçi ka thënë se Gjykata Speciale nuk është disavantazh, por është një avantazh për Kosovën.
“Shpesh thuhet se mbi Kosovën qëndron një re e zezë të cilën duhet ta largojmë. Të jemi të qartë, atë re të zezë e ka krijuar Serbia, dhe askush më mirë se kosovarët nuk mund ta largojnë atë re të zezë. Pra, Gjykata Speciale është një mundësi për të forcuar ndjenjën e drejtësisë në Kosovë, e ritheksoj ndjenjën e drejtësisë”, ka thënë ai. /tesheshi.com/
