Silvio Berlusconi, ish-kryeministri i Italisë dhe kreu i qendrës së djathtë, i larguar nga politika prej halleve të tij gjyqësore, ka shpallur rikthimin si kandidat për kryeministër, në moshën 80 vjeç.
Në një intervistë të dhënë në Corriere della Sera, ai deklaroi se do të garojë në zgjedhjet parlamentare që mbahen në marsin e vitit të ardhshëm.
Berlusconi ka marrë zemër nga fitorja e së djathtës, në Lokalet e së dielës, në disa qytete të Italisë, ku më e rëndësishme ishte ajo në Genova, ku Forza Italia ka arritur të marrë qytetin me një shumicë bindëse. Ndërkaq, Beppe Grillo dhe lëvizja e tij e Pesë Yjeve ka humbur kudo, ndërkohë që e majta e Matteo Renzit s’fitoi në balotazh asnjë qytet të madh.
Në mënyrë dinake, sidomos pas humbjes së rëndë të Marine Le Pen në Francë, Berlusconi ka dalë në zgjedhje me idenë se e djathta e Grillos e çon vendin tek e majta, ndaj duhet votuar për partinë e tij.
Por ai ka edhe një problem në Gjykatën e Strasburgut ku vendoset përfundimisht për ndalimin e tij për t’u zgjedhur, që e kanë vendosur të gjitha shkallët e gjyqësorit në Itali.
Berlusconi deklaroi në Corriere se “nuk do të jetë një vendim gjyqësor që mund të ndalojë popullin Italian që të zgjedhë liderin që do ta udhëheqë”.
Duket se e djathta ende nuk ka gjetur një lider të rie të aftë të marrë vota për të drejtuar vendin dhe Berlusconi që ende gëzon mbështetje te një pjesë popullsie, duket se është kthyer tek dëshira për të garuar.
Në fund të fundit, pas largimit, politika botërore nuk po bën gjë vetëm po prodhon lider të ngjashëm me Silvion që tregon anekdota.
Edhe Donald Trump arriti të bëhet President duke ndjekur pikë për pikë rrugën e “mësuesit” të tij politik Silvio Berlusconi, që u studiua me hollësi që prej 20 vitesh nga guru-të e presidentit të sotëm të SHBA. /tesheshi.com/
