Deklarata e fortë e Departamentit Amerikan të Shtetit ka lëvizur shumë gjëra në Tiranë.
Ambasadori amerikan Donald Lu, i cili për disa kohë nuk doli në publik pas akuzave të bëra nga PD për njëanshmëri, sot ka marrë një veprim që e kishte bërë edhe përpara se të votohej Reforma në Drejtësi.
Lu ka takuar paraditen e kësaj të premte deputeten e Partisë Demokratike, Majlinda Bregu.
Në fokus të këtij takimi ka qenë situata politike në vend.
Deputetja demokrate u shpreh se bisedoi me ambasadorin amerikan për rrugëzgjidhjet e ngërçit politik.
Ky takim vjen disa ditë para mbërritjes në Shqipëri të negociatorit të BE, David McAllister dhe raportuesit për Shqipërinë në PE, Knut Fleckenstein.
Siç dihet, Majlinda Bregu i përket “grupit të të përgjegjshmëve” në PD, të etiketuar të tilla që fillimvetën e vitit të kaluar kur kërkohej vota unanime për Reformën në Drejtësi.
Atëherë PD refuzonte ta votonte draftin e SHBA-BE-së, por një grup demokratësh me në krye znj. Bregu ishin kundër kësaj linje politike të partisë së tyre.
Kështu, ata u ledhatuan me cilësimin si “të përgjegjshëm” në funksion të votës së dhënë për reformën. Por më pas nuk qe nevoja pasi i gjithë grupi parlamentar demokrat u bë “i përgjegjshëm”, përfshirë dhe vetë Berishën, duke e votuar reformën. /tesheshi.com/
