Vendimi i Britanisë së Madhe për të braktisur Bashkimin Evropian ka nisur një efekt domino në vendet tjera evropiane, në të cilat partitë e djathta dhe euroskeptikët menjëherë kanë dalë në skenë duke kërkuar mbajtjen e referendumit edhe në vendet e tyre lidhur me mbetjen në BE.
Pas ekstremistit të djathtë holandez Gert Wilders dhe udhëheqëses së Frontit Nacional në Francë Marine Le Pen, thirrjeve për mbajtjen e një referendumi në lidhje me mbetjen apo jo në Bashkimin Evropian pas shpalljes së rezultateve të Brexit, i janë bashkangjitur edhe euroskeptikët nga vendet skandinave, njofton AP.
Partia Popullore Daneze ka thirrur sot në mbajtjen e një referendumi në lidhje me mbetjen apo jo të vendit në Unionin Evropian, por kryeministri danez ka hedhur poshtë një mundësi të tillë.
Lideri i Partisë për Pavarësi të Britanisë së Madhe Nigel Farage, kishte paralajmëruar për një efekt domino të mundshëm në vendet e Evropës Perëndimore pas shpalljes së rezultateve të Brexit, duke filluar nga Danimarka.
Në Suedi, e cila është bërë anëtare e Unionit Evropian në vitin 1995, Demokratët antievropian kanë njoftuar përmes Twitter se pas Brexit në Britani të Madhe, presim një Svexit në Suedi.
“Demokratët suedez do të fillojnë të rrisin presionin mbi qeverinë. Vendi ynë duhet të ripërtërijë marrëveshjet e arritura me Unionin Evropian”, ka thënë udhëheqësi i partisë Jimi Akesson, i cili ka pak kohë që po kërkon mbajtjen e referendumit në lidhje me këtë çështje.
Partia Majtiste e Suedisë ka propozuar ripërtëritjen e marrëveshjeve me Unionin Evropian, por udhëheqësi i kësaj partie Jonas Sjostedt ka thënë se së pari dëshirojnë të shohin se si do të duket raporti i ri i britanikëve me Unionin”, njoftojnë mediat botërore. /tesheshi.com/
