Pas berishistëve në Shqipëri, edhe Dodiku me sytë nga Trump

Serbi që mund t’i rivërë flakën Ballkanit, në pritje të ndryshimit të qeverisjes amerikane

Ndërsa berishizmi në Shqipëri, në superfrustrim, pra ajo pjesë e PD-së që ndryshe quhet Rithemelim, shpreson se riardhja e Trumpit në pushtet do iu mundësojë dhe atyre rikthim në pushtet, pothuajse të njëjtin vision shprese ka dhe Dodiku i Republika Srpska, njeriun që shihet si një zjarrvënës i mundshëm i Ballkanit me politikën e tij të ndarjes nga Bosnja.

Ai tha se pret që fitorja e Donald Trump në zgjedhjet e ardhshme presidenciale në SHBA mund të hapë derën për shpalljen e pavarësisë së Republika Srpska, duke shtuar se nuk ka hequr dorë nga një qëllim i tillë pavarësisht paralajmërimeve nga Perëndimi.

Në një intervistë të publikuar nga gazeta proqeveritare ruse Izvestia, Dodik tha se “Bosnja po zhduket” dhe prandaj RS do të kërkojë mënyra për të forcuar pavarësinë e saj.

“Ne presim që disa fuqi të mëdha të thonë se populli (serb) ka të drejtën e vetëvendosjes. Ne kurrë nuk kemi hequr dorë nga nevoja për të forcuar Republikën tonë Srpska”, tha Dodik.

“Për shembull, nëse Donald Trump fiton zgjedhjet presidenciale në SHBA, mund të krijohen disa kushte që kjo të ndodhë. Ende mund të jetë. Mendoj se është e gabuar të thuhet se nuk do të ndodhë kurrë”, tha Dodik, i cili ishte në Tatarstan javën e kaluar dhe u takua atje me presidentin rus Vladimir Putin, me të cilin, siç pretendoi ai, foli për një orë me dyer të mbyllura.

Pyetjes së Izvestia-s se a është i mundur një referendum për pavarësinë e RS-së tashmë këtë vit, Dodik iu përgjigj me deklaratën se mbetet për t’u parë dhe duke komentuar mundësinë që ky subjekt t’i bashkohet Serbisë pas shpalljes së pavarësisë nga Bosnja, tha se e sheh si të drejtë një bashkim të të gjithë serbëve sipas modelit me të cilin u bashkuan Gjermania Lindore dhe Perëndimore.

Në intervistën, e publikuar saktësisht dy vjet që kur Rusia nisi një luftë pushtuese kundër Ukrainës, Dodik mbrojti hapur politikën e Moskës dhe mbrojti vazhdimin e fushatës kundër Ukrainës, duke përfshirë pretendimin se Rusia ka çdo të drejtë për Krimenë “e cila nuk ishte kurrë ukrainase”.

“Unë besoj se Rusia nuk duhet ta lërë këtë çështje të papërfunduar. Nëse çështjet në të cilat fuqitë perëndimore vazhdojnë të ndërhyjnë mbeten të papërfunduara, pozita e Rusisë do të dobësohet. Nëse zgjidhen të gjitha çështjet në fusha të rëndësishme strategjike, kjo do t’i japë forcë Rusisë dhe gjithë botës”, tha Dodik. /tesheshi.com/