Vetëvendosje ka kërkuar që deputetët e saj, Albin Kurti, Donika Kadaj Bujupi dhe Albulena Haxhiu të lirohen menjëherë.
Përmes një njoftimi, VV ka thënë se arrestimi i deputetëve është vazhdimësi e mendësisë së qeverisë së kaluar, duke paralajmëruar se kushdo që tenton t’i ngjall marrëveshjet e dëmshme për vendin do të has në rezistencë edhe më të fuqishme qytetare.
“Me këto arrestime dhe persekutime ndaj deputetëve dhe aktivistëve të opozitës, qeveria e Ramush Haradinajt po tregon vendosmërinë e saj për të ndjekur rrugën e dy qeverive të mëhershme – qeverisë Thaçi dhe qeverisë Mustafa. Një gjë e tillë është e papranueshme, dhe asnjë veprim nuk do të mund në asnjë mënyrë t’i jetësojë më këto marrëveshje, të cilave iu ka dhënë fund rezistenca e fuqishme qytetare, pjesë e të cilës dikur ishte edhe vetë Haradinaj, i cili tashmë për të ruajtur karrigen, është shndërruar në vegël të PDK-së dhe Listës Srpska”, thotë VV.
Kjo parti më tej thotë se qeveria dhe gjykatat e stërmbushura me gjyqtarë të korruptuar nuk mund ta cenojnë shtetësinë e Kosovës e nuk mund të shkelin mbi vullnetin qytetar.
“Ne jemi të vendosur fuqishëm kundër marrëveshjeve të dëmshme për vendin tonë, dhe kushdo që tenton që këto marrëveshje t’i ringjallë sërish, ka për të hasur në rezistencë edhe më të fuqishme qytetare. Mbrojtja e Republikës së Kosovës është domosdoshmëri, ndaj me asnjë kusht s’do të lejojmë që interesi i saj të cenohet. Po ashtu asnjë tentativë për ta heshtur apo zmbrapsur Lëvizjes Vetëvendosje nuk ka funksionuar në të shkuarën e aq më pak do të funksionoj tash”, thotë VV. /tesheshi.com/
