Qeveria do të godasë së shpejti bandit. Kështu u shpreh Taulant Balla, kreu i grupit parlamentar të PS-së, duke reaguar në këtë mënyrë ndaj deklarimeve të ambasadorit amerikan, Donald Lu, sipas të cilit në Shqipëri veprojnë 20 familje mafioze.
Në një deklaratë për mediat, Taulant Balla u shpreh se shteti do të godasë krimin e organizuar dhe se do të adresohet çdo shqetësim, jo vetëm i ambasadorit të SHBA-ve Donald Lu.
“Dua të mos flas përpara autoriteteve ligjzbatuese, por dua të them shumë qartë që qeveria ka një plan të mirëkoordinuar me gjithë institucionet ligjzbatuese dhe në çdo rast që duhet mbështetja e Kuvendit për të goditur shtetin në krimin e organizuar ajo do të jetë e sigurt. Do adresohet çdo shqetësim, jo vetëm i ambasadorit, por edhe i çdo shtetasi për forcimin e ligjeve në Shqipëri”, tha Balla.
Një tjetër çështje e diskutuar nga deputeti i PS-së ka qenë drafti i ri i mazhorancës për një ligj të kodit të etikës për ligjvënësit shqiptarë. Balla deklaroi se deputetët gjatë ushtrimit të detyrës nuk do të lejohen që të kenë aktivitete tregtare apo të marrin dhurata nga persona të tjerë.
“Doktrina politike dhe sidomos ajo mbi etikën në parlament e konsideron problematike dhe marrjen e dhuratave për ligjvënësit.
Është një praktikë në shumë vende që më në fund përmes këtij kodi do të fillojë të rregullohet dhe në marrëdhëniet me institucionet e tjera.
Komunitetet kanë pritshmëri të larta për mënyrën e sjelljes së deputetëve dhe ne nëpërmjet këtij kodi për 3 javë do t’i japim mundësi çdo komuniteti të çdo zone të kenë më të qarta pritshmëritë por dhe llogaridhënien e çdo deputeti.
Kjo do të ndikojë në rritjen e përgjegjshmërisë së kodit, i cili do jetë një tregues i përgjegjësisë për statusin dhe për respektimin e vlerave të Kuvendit.
Ky kod promovon ndershmërinë dhe përgjegjësinë e deputetëve gjatë mandatit të tyre”, tha Balla. /tesheshi.com/
