Lëvizja Vetëvendosje ka vendosur që të kthehet në punimet e kuvendit të Kosovës, pas mbi 90 ditësh bojkot.
Një gjë të tillë e konfirmoi sot në një konferencë për media kryetari i VV-së Visar Ymeri dhe shefi i grupit parlamentar të kësaj partie Glauk Konjufca.
Ymeri dhe Konjufca deklaruan se nëse tentohet përsëri të kthehen marrëveshjet, ajo e Demarkacionit të kufirit me Malin e Zi dhe Asociacionit të Komunave me shumicë serbe në Kosovë, nuk do të përjashtojnë metodat e kaluara për t’i kundërshtuar.
Visar Ymeri tha se VV është i gatshëm të dakordohen me AAK-në e NISMA-n për kundërshtimin e këtyre dy marrëveshjeve.
“Lëvizja VV do ta vazhdoj punën e saj në parlament si opozitë dhe do ta vazhdoj kundërshtimin e saj sepse mungesa e opozitës në parlament po i konvenon më shumë partive në pushtet. Çfarëdo ringjallje e Asociacionit dhe tentimi për ta kaluar Demarkacionin do ta defunksiona1lizojë edhe më shumë institucionet e Kosovës më shumë se ajo që keni parë”, paralajmëroi Ymeri në konferencë për media, transmeton portali tesheshi.com.
Deputetët e VV-së për herë të fundit në kuvendin e Kosovës kanë qenë në ditën e votimit të presidentit Hashim Thaçi, më 26 shkurt.
Ata do të rikthehen me ndryshime në parlament, pasi në radhët e veta kanë marrë Donika Kadaj – Bujupin e AAK-së, ndërsa janë braktisur nga Ilir Deda. /tesheshi.com/
