Dolores Vinsted 83 vjeçare dhe burri i saj Trent Vinsted 88 vjeçar kanë qenë të martuar për 64 vjet. Ditët e fundit ata kaluan në një dhomë të përbashkët në spital dhe lanë këtë botë duke e mbajtur njëri-tjetrin për dore.
Fëmijët tregojnë se Dolores dhe Trent ishin personalitete krejtësisht të ndryshme.
“Dolores ishte e qetë dhe i pëlqente të gatuaj. Trent-it i pëlqente të qëndrojë jashtë më shumë dhe kalonte ditët duke peshkuar në liqen” tregojnë fëmijët e tyre.
“Pas daljes në pension, ata kalonin ditë të pafundme, të qeta së bashku në shtëpinë e tyre, duke shikuar së bashku TV çdo natë, dhe duke shkuar së bashku në kishë çdo të dielë. Tingëllon shumë e thjeshtë, por jeta e tyre ishte aq e ëmbël”, thotë Sheryl, vajza e tyre. “Ata e donin njëri-tjetrin edhe nëpër ditët monotone. Secilën ditë të jetës së tyre, ata e dashuronin njëri tjetrin përherë e më shumë”.
Dolores dhe Trent Vinsted vdiqën më 9 dhjetor në spitalin “Hospital West Saint Thomas” në Nashville.
Pak ditë më parë, Dolores, e cila ishte mirë me shëndet, kishte qëndruar në spital pranë shtratit të burrit të saj, i cili kishte pësuar dështim të veshkave.
Dializa filloi të dobësojë zemrën e tij, dhe ai u transferua në kujdesin intensiv, ndërsa Dolores, me dy fëmijët e tyre, po shikonte pafuqishëm se si po përkeqësohej gjendja e tij.
Dy ditë më pas, më 7 dhjetor, fillon të ndryshojë gjendja shëndetësore edhe e Dolores. Ajo fillon të ankohet për dhimbje koke dhe mundim të vazhdueshëm. Më vonë mjekët kuptojnë se ajo ka përjetuar aneurizëm të trurit dhe me urdhër të mjekut, edhe asaj i duhet të shtrihet në spital.
Fillimisht Dolores qëndron në një dhomë ndaras, dhe meqë çdo aktivitet i trurit të saj pushon së punuari, mjekët detyrohen ta mbajnë atë të lidhur për aparaturë mjekësore.
Duke e parë gjendjen e Dolores dhe dhimbjen që po e përjetonte Trent, stafi i spitalit për herë të parë në historinë e spitalit, lejon çiftin të qëndrojnë në të njëjtën dhomë, me shtretër të lidhur, për të kaluar momentet e tyre të fundit së bashku.
Dolores ndalon së marruri frymë më 9 dhjetor në ora 9 të natës. Pak çaste më vonë, vdes edhe Trent.
“Ai nuk ka mundur të përballojë faktin që Dolores nuk është më pranë tij. Ai vdiq për shkak të zemrës së thyer”, thotë vajza e tyre Sheryl për Washington Post”.
Ata lanë pas vetes dy fëmijë, tre nipër e mbesa si dhe tetë stërnipër.
Në fillim të vitit të ri, më 17 janar, ata kanë festuar saktësisht 64 vjet të martesës. Ata u varrosën, natyrisht, përkrah njëri tjetrit./tesheshi.com/
