Nga Blendi Gashi
Strukturat paralele të Serbisë vazhdojnë të jenë aktive në Kosovë, edhe pse marrëveshja e Brukselit parashikon eliminimin e tyre.
Shteti serb, përmes grupeve mafioze që i ka vendosur në veri të Mitrovicës, nuk po lë gurë pa lëvizur për të destabilizuar dhe mbajtur në tension situatën e sigurisë në Kosovë.
Dëshmia më e mirë, është provokimi i fundit ku serb që jetojnë në veri shihen në mes të qytetit me uniforma të paramilitarëve serbë të cilët në luftën e fundit vranë dhe masakruan mijëra kosovarë të pafajshëm.
Një gazetar i televizionit publik, RTK-së i cili duke kaluar në veri të Mitrovicës, rastësisht ka parë një qytetar serb të veshur me uniformë të ushtrisë së Serbisë, të cilin e ka fotografuar për të nxjerrë në pah të vërtetën e ditur por të heshtur se uniformat e paramilitarëve serb edhe pas 16-vitesh vazhdojnë të jenë prezent në shtetin e Kosovës.
Edhe pse provokimet e tilla nga serbët në veri nuk janë të pakta, si zakonisht Qeveria e Kosovës nuk është në gjendje të tregoj fytyrën e shtetit ndaj kriminelëve që veprojnë në veri, por vazhdon të zgjedh heshtjen për të tejkaluar incidentet e përditshme që ndodhin në këtë pjesë të vendit.
Kryeministri Isa Mustafa por edhe të gjitha mekanizmat e sigurisë në vend, si Ministria e Brendshme, Policia e Kosovës, Agjencia Kosovare e Intelegjencës me mosreagimin e tyre, tregojnë se institucionet e shtetit janë të paafta për të mbrojtur sovranitetin e vendit por edhe të ruajnë sigurinë e përgjithshme.
Ekspertët e sigurisë: po rrezikohet siguria kombëtare e Kosovës
Të vetmit që reagojnë ndaj veprimeve të papërgjegjshme të Serbisë të cilat kanë qëllim të prishin sigurinë në Kosovë janë ekspertët e sigurisë të cilët alarmojnë për rrezikun që mund t’i kanoset vendit.
Burim Ramadani, njohës i çështjeve të sigurisë paralajmëron se rreziku për destablizimin e Kosovës në aspekt të sigurisë vetëm sa po rritet.
Ramadani, në një prononcim për tesheshi.com thotë se duke parë një gjendje jostabile shumëmuajshe, brenda Kosovës mund së shpejti të veprojë faktori i tretë, kryesisht Serbia.
Ai thotë se shteti duhet të zgjohet nga gjumi dhe të jap një sqarim për rastin në fjalë.
“Pamjet publike të dikujt me uniformë të ushtrisë së Serbisë brenda territorit të Kosovës, në veri të Mitrovicës, është qartësisht një rrezikim direkt i sigurisë kombëtare të Kosovës. Serbia, si faktor i tretë, mund të tentojë të orientojë krejt çështjet e Kosovës kah pikësynimet e Serbisë. Përgjegjësia për shtetin tonë duhet të jetë e të gjithëve, pa dallim. Kjo përgjegjësi detyron elitën politike dhe institucionale të shohin përtej qasjeve të ngurta”, thekson Ramadani.
Eksperti tjetër i çështjeve të sigurisë, Hajrullah Tërnava, thotë se derisa të zgjidhet çështja e kufirit Kosovë-Serbi do të ketë edhe ndërhyrje të tilla nga ana e shtetit serb në shtetin tonë.
Tërnava, thotë se nëse policia e Serbisë nuk ju përmbahet marrëveshjeve mes dy shteteve dhe e cenon integritetin e territorit të Kosovës, incidenti është serioz dhe e rrezikon direkt sigurinë e Kosovës që mund të vije deri te konflikti ushtarak mes këtyre dy shteteve.
“Nëse bëhet fjalë për struktura paralele në veri të Mitrovicës nga vet popullata e asaj pjese, institucionet e Kosoves duhet të reagojnë dhe t’i shpërbëjnë këto sturktura por gjithnjë duke qenë në kontakt me faktorët e Bashkimit Evropian të cilët i kanë udhëhequr bisedimet rreth shpërbërjes së strukturave në fjalë. Kjo situatë tani bëhet edhe për përfitime politike në Serbi pasi janë në prag zgjedhjet politike”, ka thënë eksperti Tërnava për tesheshi.com.
“Nuk ka shtet”
Nexhmendin Spahiu, qytetar nga Mitrovica, njëherit analist politik nuk çuditet fort me mosreagimin e institucioneve të shtetit ndaj cenimit që strukturat serbe i bëjnë në vijimësi Kosovës.
“Nuk ka shtet. Shtetit i hiqet flamuri kombëtar në mes të Prishtinës, te rrethi i spitalit që e ka vendosur ish -presidenti Fatmir Sejdiu dhe nuk reagon, e lëre më 40 kilometra larg Prishtinës”, thotë analisti Spahiu për tesheshi.com.
Ndryshe, kryeministri serb Aleksandër Vuçiq nesër do të vizitoj Kosovën me qëllimin që të provojë dhe injorojë shtetin e Kosovës dhe sigurisht për t’iu dhënë përkrahjeve kriminelëve që veprojnë në veri që të punojnë për destabilizimin e Kosovës.
Portali tesheshi.com ka tentuar të marrë një përgjigje nga Qeveria e Kosovës nëse Vuçiq ka marrë leje për të hyrë në shtetin tonë por ata nuk janë përgjigjur në telefon.
Zëdhënësi i Policisë së Kosoëvs, Baki Kelani ka thënë se organet e sigurisë në vend janë përgjegjëse për t’i ofruar përcjellje policore çdo personaliteti dhe niveli të lart që viziton Kosovën.
“Çdo delegacion që vjen në Kosovë dhe posedon leje të autoritete të Replikës së Kosovës , Policia varësisht prej nivelit të delegacionit dhe vlerësimeve të rrezikshmërisë i ofron përcjellje policore”, ka pohuar Kelani. /tesheshi.com/
