Një hetim është nisur për një video që tregon anëtarët e Partisë Konservatore në pushtet duke kërcyer dhe pirë gjatë një feste të Krishtlindjeve 2020.
Policia britanike ka rihapur një hetim për shkeljet e rregullave të karantinës qeveritare gjatë pandemisë pasi rishikoi pamjet video të anëtarëve të Partisë Konservatore në pushtet duke kërcyer dhe pirë gjatë një feste të Krishtlindjeve 2020.
Festa në selinë e Konservatorëve u zhvillua kur tubimet sociale ishin të ndaluara në ambiente të mbyllura sipas rregullave të vendosura për të frenuar përhapjen e virusit Corona.
Policia e Londrës tha se ata po hetojnë gjithashtu një tubim në Parlament më 8 dhjetor 2020, ku dyshohet se kanë marrë pjesë anëtarë të Dhomës së Komunave dhe Dhomës së Lordëve.
Njoftimi rihapi hetimin e “Partygate” që qeveria kishte shpresuar se kishte përfunduar.
Zbulimi se zyrtarët e lartë mbajtën festa ditëlindjesh në zyrën e kryeministrit dhe ndërtesa të tjera qeveritare gjatë pandemisë, ka ngjallur zemërim në mesin e britanikëve që respektuan rregullat, të cilët u penguan të vizitojnë miqtë dhe familjen apo edhe t’u thonë lamtumirë të afërmve që po vdisnin në spitale.
Rënia e Johnson
Policia gjobiti një numër zyrtarësh, duke përfshirë kryeministrin e atëhershëm Boris Johnson dhe udhëheqësin aktual të Partisë Konservatore Rishi Sunak, i cili ishte ministër i financave në qeverinë e Johnson.
Skandali çoi në rënien e Johnson nga pushteti. Partia e tij e detyroi atë të largohej nga detyra në korrik 2022 mes pyetjeve në rritje në lidhje me gjykimin dhe etikën e tij.
Muajin e kaluar, një komision hetimor parlamentar arriti në përfundimin se Johnson gënjeu Parlamentin britanik në mënyrë të përsëritur në çështjen “Partygate” kur ai siguroi deputetët se rregullat ndiqen në çdo kohë.
Komisioni rekomandoi një pezullim 90-ditor për Johnson, të cilin ai e shmangu duke dhënë dorëheqjen.
Ai sulmoi komisionin, në të cilin konservatorët kanë shumicën, duke e akuzuar atë për një “gjueti shtrigash” që synon ta shkatërrojë atë. /tesheshi.com/
