Ministri i jashtëm turk Mevlut Çavusoglu tha të hënën se partnerët në avionin luftarak F-35 nuk mbështesin hapat e marra nga Shtetet e Bashkuara në lidhje me ndërprerjen e trajnimit të pilotëve turq.
Pentagoni në fillim të këtij muaji njoftoi se trajnimi bazën ajrore në Arizona i pilotëve turq në avionët luftarakë F-35 do të mbyllet. Kjo pasi Turqia ka blerë sistemin e mbrojtjes anti-raketor rus S-400.
SHBA ka deklaruar në mënyrë të përsëritur se S-400 nuk është e përputhshme me sistemet e NATO-s dhe paralajmëron Turqinë mbi sanksione dhe pasoja të tjera të blerjes së këtij sistemi.
Çavusoglu në fillim të këtij muaji ka thënë se vendi i tij nuk do të përkulet para “ultimatumeve” të Shteteve të Bashkuara, për përjashtim nga zhvillimi i programit dhe blerja e avionëve luftarakë F-35, për shkak të një marrëveshjeje me Rusinë për blerjen e sistemeve të saj të mbrojtjes raketore.
Sekretari amerikan i Mbrojtjes, Patrick Shanahan tha në një letër drejtuar homologut të tij turk se trajnimi i pilotëve turq do të përfundojë më 31 korrik dhe se Turqia nuk do të lejohet të marrë përsipër katër F-35 që ajo ka blerë.
Uashingtoni thotë se S-400 paraqet një kërcënim për F-35.
Cavusoglu pastaj përsëriti se marrëveshja e prokurimit S-400 u mbyll dhe se Turqia nuk do të anulojë vendimin e saj. /tesheshi.com/
