Skuadra kryeqytetase ka bërë paraqitjen më të dobët në Europë në raundet kualifikuese të kësaj vere. Ndaj Krasnodarit rus, Partizani është treguar i pafuqishëm për të rezistuar, duke iu dorëzuar një humbjeje të thellë 4-0.
Humbja e kësaj mbrëmjeje në play-off-in e Ligës së Europës e bën Partizanin thuajse të eliminuar, edhe pse është dhe një ndeshje tjetër për t’u luajtur një javë më pas.
Pjesa e parë është mbyllur 3-0 për vendasit rusë, që kanë dominuar gjatë gjithë minutave. Joaozinho ka zhbllokuar fillimisht rezultatin me një 11-metërsh në minutën e 18-të. Ka pasuar goli i Smolov-it në minutën e 27-të, e ai i Jedrzejczuk-ut në mbyllje të kësaj pjese. Goli i katërt ka ardhur në nisje të çerekorëshit të fundit të lojës.
Sidomos në fundin e pjesës së dytë, lojtarët e Partizanit janë shthurur thuajse plotësisht, e rusët edhe mund ta kishin thelluar fitoren.
Rezultati 4-0 u jep qetësinë e duhur rusëve, që tani e shohin veten pranë fazës në grupe në Ligën e Europës. /tesheshi.com/
