Partizani i Tiranës nënshkruan me Bebeton. Bëhet fjalë pikërisht për Brazilianin e famshëm që ngriti Kupën e Botës me kombëtaren e vendit të tij në vitin 1994.
Ka qenë presidenti i klubit të kuq Gaz Demi, që nëpërmjet lidhjeve të tij, kontaktoi me Bebeton, i cili e ftoi të bëhet mysafir në shtëpinë e tij në Rio de Zhaneiro, ku kanë shkrepur dhe një foto.
Sipas informacionit që mbërrin nga ai takim, është nënshkruar një marrëveshje ku braziliani do të përzgjedhë lojtarë të talentuar nga vendi i tij, për t´i afruar në Tiranë e për t´i bërë pjesë të Demave të kuq.
Po kështu Bebeto do të japë eksperiencën e tij edhe në çështje të caktuara ndërkombëtare. Siç mësohet paraprakisht, pas takimit, një futbollist që ka luajtur me U 21 të Brazilit, do të vijë shumë shpejt te Partizani, për ta ndihmuar skuadrën në arritjen e objektivit të fitimit të kampionatit. Pas Moxhit drejtues me të drejta absolute, e Julianos si trajner, tashmë Partizani do të jetë në relata zyrtare, me një tjetër kampion bote, si Bebeto.
E ku i dihet nëse do të ndalojë këtu, sepse askush nuk e quan të pamundur, që shallin e kuq t’ia shohim të varur në qafë, Romarios, Dungës apo Ronaldos. /tesheshi.com/
