Ennahda do të mbajë një kongres në datat 20-22 maj, ku do të zyrtarizojë ndarjen e aktiviteteve të saj politike nga ato fetare.
“Tunizia është tani një demokraci. Kushtetuta e 2014-ës ka vënë caqe për shekullarizmin ekstrem dhe për religjionin ekstrem,” është cituar nga e përditshmja franceze Le Monde të ketë thënë drejtuesi historik i kësaj partie, Reshid Gannushi.
“Ne duam që aktiviteti fetar të jetë plotësisht i pavarur nga aktiviteti politik,” ka vijuar të citohet Gannushi. “Kjo është mirë për politikanët, sepse ata nuk do të akuzohen më për manipulimin e fesë për qëllime politike, e mirë për fenë, sepse nuk do të merret peng nga politika.”
Agjencia e lajmeve AFP thotë se Reshid Gannushi ka deklaruar për Le Monde se në Tunizi nuk ka vend për Islamin politik pas Pranverës Arabe.
“Ne po e lëmë Islamin politik dhe po hyjmë në Islamin demokratik. Ne jemi demokratë muslimanë, që nuk pretendojmë më të përfaqësojmë Islamin politik,” përcillet gjithashtu të jetë shprehur Gannushi.
Për Reshid Gannushin, Ennahda është një parti politike, demokratike dhe civile, por si pikë reference ka ende vlerat e Islamit të lashtë dhe modern.
Ai pritet të zgjidhet sërish drejtuesi i kësaj partie, me objektivin për ta bërë atë të prirur tërësisht nga aktiviteti politik.
Sot një 74-vjeçar, Gannushi do të jetonte për 20 vite në mërgim, për t’u kthyer në Tunizi në vitin 2011. /tesheshi.com/
