“Nuk do të ketë zgjedhje më 5 qershor ashtu siç është paralajmëruar në bazë të Marrëveshjes së Përzhinos e nënshkruar nga 4 liderët e partive më të mëdha politike në Maqedoni. Ato do të shtyhen më 4 ose 11 shtator”. Kështu ka paralajmëruar Partia për emancipimin e romëve.
Kjo parti bën me dije se lajmi është marrë vesh nga burime të tyre, të cilët thonë se zgjedhjet duhet patjetër të shtyhen, ndërsa kryetari i Kuvendit, Trajko Veljanovski, sipas tyre do të duhet të caktojë një mbledhje ku të ftojë deputetët dhe t’i informojë për zgjatjen e mandatit.
“Në ato mbledhje do të sillet vendimi për shtyrjen e zgjedhjeve dhe vazhdimin me punë deri në datën e zgjedhjeve apo përfundimin e obligimeve që dalin nga marrëveshja e Përzhinos”, – thonë nga Partia për Emancimin e Romëve.
Sipas kësaj partie, për shpërbërjen e Kuvendit do të miratohet vendimi për shpalljen e datës 4 ose 11 shtator si ditë kur do të mbahen zgjedhjet e parakohshme parlamentare. /tesheshi.com/
