Opozita në Shqipëri, nga akuzat ka kaluar së fundi dhe në propozime, siç nisi të bënte dhe PS-ja në dy-vjetëshin e fundit të të qënit në opozitë. Në Komisionin e Ekonomisë Partia Demokratike paraqiti një projektligj, në të cilin parashikohet t’u jepet energji falas 82 mijë familjeve që marrin ndihmë ekonomike.
Dhe përllogaritja e Bodes qe e thjeshtë: “Sado të duket një kosto shumë e madhe, nuk është më shumë se 400-500 milionë lekë në vit. Kërkon vetëm vullnet dhe identifikim të familjeve në nevojë. Kostoja për mendimin tim nuk është problem”, tha ish-kreu i Financave në qeverinë e Berishës.
Sakaq, edhe deputeti Dashamir Shehi e mbështeti projekligjin në fjalë me këtë lloj arsyetimi: “Keni çuar policinë të mbledhë lekët, keni rritur çmimin, do bëni ndonjë lëshim? Si qenka kjo punë kështu”.
Ndërsa deputetë të mazhorancës në komision nuk e kundërshtuan apriori, por thanë se drafti duhet të marrë më parë dakortësinë e qeverisë dhe Komisonit të Çështjeve Sociale. Ata pretenduan se mënyra e propozimit të projekligjit çalon dhe jo projekligji në vetvete.
Atë që opozita e ofroi me projetkligj, ditë më parë e artikuloi dhe Avokati i Popullit, Totozani. Pra, faljen e energjisë kundrejt një numri familjesh në nevojë. /tesheshi.com/
