Me shtimin e zërave se të mbeturit jashtë parlamentit në PD do t’i largohen kësaj partie për të krijuar një të re – Topalli, Patozi, Bregu etj.- ish-ndër njerëzit që po ashtu u largua 20 vite më parë për t’u rikthyer më pas në parti, Tritan Shehu, ka bërë thirrje që kjo të mos ndodhë. Duke marrë si shembull rastin e tij e të ca të tjerëve si ai, Shehu tha se ikja e më pas formimi i një partie të re nuk do ketë rezultat.
“Edhe unë e kam provuar këtë pak kohë më parë, nuk isha në parlament megjithatë isha aktiv në PD dhe më pas u rizgjodha. Pa dyshim një politikan aspiron të jetë në parlament kjo është normale dhe unë i mirëkuptoj kolegët, por nuk është fundi i botës mos jesh në Parlament. Më mirë të mendojmë për të punuar brenda sesa për të ndarë. Eksperiencat e ndarjes nuk kanë qenë pozitive dhe nga ndarja kanë shkuar prap tek bashkimi. Pastaj vendimi përfundimtar i takon gjithësekujt dhe çdo kush merr vendimet e veta politike”, tha Shehu në Ora Neës.
Ishte Basha ai që la jashtë liste në zgjedhjet e 25 qershorit figura si Jozefina Topalli, Astrit Patozi, Majlinda Bregu, Tomor Alizoti etj., gjë që i irritoi këta të fundit. Dhe tashmë po flitet se disa nga këto emra, duke u vetëndjerë të përzënë nga Basha, kanë ideuar themelimin e një partie të re.
Ndrësa Shehu ka dashur të risjellë në kujtesë rastin e Partisë së re Demokratike, ose ndryshe PD-së reformatore, me kryetar Genc Pollon, e cila pasi i bëri karshillëk Berishës që nga ’98 e deri në 2005, më rikthimin në pushtet të demokratëve vendosën të shkriheshin si parti për t’u kthyer në familjen e vjetër. /tesheshi.com/
