Pas punimeve të tejzgjatura, parlamenti turk miratoi dje paketën e sigurisë së brendshme, të kritikuar pa fund nga partitë e opozitës.
Projektligji u hartua pas dhunës së shpërthyer gjatë protestave të 6-7 tetorit në përkrahje të Kobanit.
Me projektligjin që e ka marrë votën në parlament tashmë, policisë i njihet autoritet më i gjerë për përdorimin e armëve. Projektligji u jep punonjësve të policisë mundësinë për të qëlluar për pengimin e dëmtimit të pasurisë.
Sipas tij, policia do të jetë në gjendje të përdorë armët kundër atyre që sulmojnë me bomba molotov, me eksploziv, me mjete mbytëse dhe armë të tjera shkollat, ndërtesat publike dhe vendet e adhurimit.
Protestuesit në tubime apo demonstrata nuk lejohen të mbajnë fishekzjarre, molotov, gogla hekuri dhe shufra me llastiqe.
Ata të cilët mbulojnë pjesërisht apo plotësisht fytyrën gjatë manifestimeve të kthyera në një marshim propagande për një organizatë terroriste do të dënohen deri në pesë vjet me burg, thotë projektligji.
Gjithnjë sipas ligjit të ri për sigurinë, drogat sintetike (bonzai) dhe drogat derivative janë shtënë në fushën e veprimit të kodit penal turk, për t’i bërë dënimet për to më shkurajuese. Po ashtu janë dyfishuar dënimet për këto droga.
Prefektët nga tani do të jenë në gjendje t’u japin urdhrat e nevojshme zyrtarëve të zbatimit të ligjit për gjetjen e bërësve të veprave të paligjshme.
Paketa e sigurisë së brendshme u diskutua për javë të tëra në parlamentin turk, dhe shpeshherë polemikat u kthyen në grindje masive e në goditje të ndërsjellta të parlamentarëve.
Nga versioni fillestar i projektligjit, me 132 nene, u hoqën 63, duke miratuar vetëm 69 nene prej tyre. /tesheshi.com/
