Shënimi që dikur dilte në ekranin e TVSH-së, “defekt teknik, rifillojmë se shpejti”, ishte sot realitet në sallën e parlamentit, pasi sistemi audio nuk funksiononte. Për kët arsye, kryetari Ilir Meta e ndërpreu seancën deri në rregullimin e defektit që të bëjë të mundur vijimin normal të seancës.
Kjo ndodhi pas një fjalimi të deputetit demokrat Astrit Patozi, i cili e quajti qeverinë Rama tashmë të rrëzuar, duke e argumentuar këtë me dështimet e saj njëpasnjëshme, sipas gjykimit politik të tij.
Patozi vuri gishtin tek dyshja Rama – Meta, që sipas tij i janë sulur Shqipërisë për ta plaçkitur, duke patur në qendër të akuzave rastin ÇEZ.
Patozi tha se kjo qeveri është e para që nga krijimi i shtetit shqiptar më 1912 që nuk ka ngjallur asnjë ditë shpresë prej kur ka nisur të drejtojë vendin para dy vjetësh, gjë që nuk ka ndodhur as pas vitit `97 ku Shqipëria ishte e shkatërruar. /tesheshi.com/
