Parlamenti shqiptar u përfshi sërish nga kaosi si pasojë e hedhjes së tymueseve si dhe e flakadanëve, nga ana e deputetëve opozitare të kahjes Berisha. Siç janë përbetuar se nuk do ketë më jetë të rregullt parlamentare, ashtu dhe po ndodh, ku dirigjent është vetë Berisha, të cilit së fundi SPAK i ka arrestuar dhëndërin.
Për këtë situatë të krijuar, reagoi kreu i Grupit Parlamentar të PS-së, Bledi Çuçi, duke thënë se në seancë do të diskutoheshin projektiligje të propozuara nga PD, por që për shkak të kaosit të shkaktuar nga opozita, ligjet as nuk u diksutuan.
Çuçi është pyetur nga gazetarët në lidhje me kërkesën për komisionet hetimore, si shkak i irritimit, ku ai tha se është e drejtë e opozitës që ta kërkojnë, por brenda kërkesave të Kushtetuës.
“Sot kishim për shqyrtim nismat e opozitës brenda të drejtës së opozitës për të paraqitur nismat ligjiore. Edhe për shqyrtimin e projekteve të tyre ata shkaktuan kaos. Ne nuk kemi thënë që opozita s’ka të drejtë të ngrejë komisione. Madje e kemi thënë që është e drejtë e padiskutueshme. E vetmja gjë që na bën që mos miratojmë ka të bëjmë me objektin. Po të jetë brenda kërkesave që ka Kushtetuta, pa diskutim”, tha ai.
Por si do vijohet më tej?
“Tymueset dhe barrikadat janë skenar i opozitës. Do vazhdojmë të miratojmë ligje, të qeverisim. Debati parlamentar nuk është vetëm në seancë plenare, është edhe më i gjerë në komisione. Po opozitë? Me forcë nuk i marrim t’i fusim në komisione. Skenari ynë është të miratojmë ligjet. Nuk i ndezim ne flakadanët, nuk e bllokojmë ne foltoren, nuk heqim ne me dhunë”, tha Çuçi ndër të tjera.
Kujtojmë se skena të tilla u shfaqën për herë të parë para pak vitesh në parlamentin kosovar, ku Vetëvedosje në opozita nisi të protestonte me tymuese kundrejt ligjit për demarkacion me Malin e Zi. Tashmë kjo formë anarkike e majtë po implementohet nga ata që në politikën shqiptare e konsiderojnë veten të djathtë. /tesheshi.com/
