Një delegacion i gjerë dhe i lartë parlamentar shqiptar pritet të vizitojë Maqedoninë për të mbledhur fakte mbi problemet e të drejtat e shqiptarëve atje. Parlmenti shqiptar thërret një seancë dëgjimore urgjente në Komisionin e Jashtëm, në lidhje me situatën më të fundit në Maqedoni pas operacioneve policore në disa fshatra shqiptare.
Sekretari i Përgjithshëm i Ministrisë së Punëve të Jashtme, Qirjako Qirko dhe drejtori për Rajonin, Besnik Rama, kanë raportuar në një mbledhje që është zhvilluar me dyer të mbyllura. Siç mësohet, kreu i Komisionit Arta Dade, ka kërkuar nga diplomacia shqiptare që të kryejë rolin e saj vendimtar për t’iu gjendur shqiptarëve të Maqedonisë në këtë situatë. Qirko ka bërë të ditur se puna e ambasadës shqiptare tani është e paplotë, pasi po mbahet peng çështja e emërimit të ambasadorit shqiptar në Shkup. Qeveria shqiptare ka propozuar emrin e diplomatit Fatos Reka, si titullar i ambasadës shqiptare në Maqedoni, por emri i tij është rrëzuar nga Presidenti Bujar Nishani, i cili sipas Kushtetutës ka të drejtën e dekretimit.
Qirjako Qirko, ka deklaruar se shqiptarët e Maqedonisë janë një faktor stabiliteti dhe këtë po e tregojnë edhe në momentet aktuale, ndërsa kanë kritikuar autoritetet e Shkupit për një politikë me dy standarde.
Parlamenti shqiptar pritet të hartojë një deklaratë mbi situatën në Maqedoni, por ehe të kërkojë zgjidhjen e ngërçit të ambasadorit të Tiranës zyrtare në Shkup. Siç mësohet, vetë drejtori rajonal i MPJ ka qenë në Maqedoni ditët e fundit dhe ka furnizuar deputetët me një dosje të gjerë mbi këto zhvillime.Kjo dosje mësohet se përmban në mënyrë të detajuar të gjitha shkeljet dhe mos zbatimet e Marrëveshjes së Ohrit nga Shkupi zyrtar. Në Kuvend u fol për një vizitë në Maqëdoni të një grupi të zgjeruar deputetësh për të mbledhur fakte mbi zhvillimet e fundit.
/tesheshi.com/
