Parlamenti rus voton unanimisht: Putin mund të dërgojë trupa ushtarake në Siri

Unanimisht, parlamenti rus votoi të mërkurën për t’i dhënë të drejtën presidentit Vladimir Putin të dislokojë forca ushtarake ruse në Siri, një lëvizje kjo sipas Kremlinit, e cila është e limituar vetëm për forcat ajrore.

Rusia e ka shtuar praninë e saj ushtarake në Siri, ku qëndron në mbështetje të presidentit Bashar al Assad dhe qeverisë së tij në një konflikt që tashmë e ka vendosur regjimin përballë kryengritësve por edhe militantëve të ISIS.

Sergei Ivanov, kreu i administratës së Kremlinit tha pas votimit në dhomën e lartë të parlamentit se presidenti sirian i ka kërkuar lidershipit rus mbështetje ushtarake për vendin e tij.

Por, ky votim, sipas tij, nuk do të thotë se trupat ushtarake ruse do të angazhohen në konflikt pasi leja i referohet përdorimit të forcës ajrore.

“Nëse do të ketë një koalicion të përbashkët, gjë që unë e dyshoj, apo dy koalicione, një amerikan dhe një rus, atyre do iu duhet të koordinojnë veprimet”, thanë ekspertët rusë.

Por, së pari, për përfshirjen e trupave ruse duhej ligji, dhe ai u votua.

Në herën e fundit që parlamenti rus i dha Putinit të drejtën e dislokimit të trupave jashtë vendit, Moska aneksoi Krimenë nga Ukraina e kjo ndodhi një vit më parë. /tesheshi.com/