Qeveria e Marrëveshjes Kombëtare në Libi, e mbështetur nga OKB-ja, ka marrë një goditje sot, pasi parlamenti libian nuk i ka dhënë besim përmes votimit.
Në seancën e kësaj të hëne kanë marrë pjesë 101 deputetë, me 61 prej tyre që kanë votuar kundër qeverisë së unitetit, ndërsa 39 kanë abstenuar e një ka votuar pro saj.
Ky votim ka qenë i pari që nga janari, kur qe hedhur poshtë një listë e parë e ministrave të Qeverisë së Marrëveshjes Kombëtare. Sesionet parlamentare në Tobruk janë shtyrë apo janë bllokuar në mënyrë të përsëritur.
Nuk dihet ende se çfarë do të ngjasë, por disa deputetë libianë kanë deklaruar se votimi nënkupton shpërndarjen e menjëhershme të qeverisë.
Kjo Qeveri e Marrëveshjes Kombëtare u formua si rezultat i një marrëveshjeje të nënshkruar në dhjetor me ndërmjetësimin e OKB-së.
Vota kundër në parlamentin libian është një zhvillim negativ në përpjekjet për t’i dhënë fund krizës që e mban vendin të përçarë mes forcave rivale. /tesheshi.com/
