45 ditë pas vdekjes së aktivistit të Vetëvendosje-s, Astrit Dehari, ligjvënësit kosovarë kanë debatuar për këtë rast tragjik.
Ashtu edhe siç pritej kjo seancë u shfrytëzua kryekëput për përfitime politike, dhe me akuza mes mazhorancës e opozitës, ku njëra më shumë se tjetra bënin viktimën duke u shtyrë se cila po qan më shumë.
Ndërsa opozita kërkonte që të japin llogari personat gjegjës, si ministri i Brendshëm Skender Hyseni dhe ajo e Drejtësisë Dhurata Hoxha, pozita akuzonte Vetëvendosje-n se po mundohet të përfitoi politikisht nga ky rast, derisa thanë se nuk kanë gjë kundër nëse rasti hetohet nga një ekspertizë ndërkombëtare.
“Kapen për thirrjen e seancës”
Debati qysh në fillim nisi me përplasje për mënyrën se si është thirrur seanca.
Vetëvendosje që dështoi më parë të mbledh nënshkrimet për një seancë të jashtëzakonshme për Astritit, akuzoi dy partitë në pushtet se seancën e sotme e “rrëmbyen”, por PDK e LDK pohuan se nuk kanë dashur të debatojnë pa u dhënë një raport nga institucionet.
Shefi i grupit parlamentar të VV-së, Glauk Konjufca, tha se seanca e sotme është “rrëmbyer” nga pushteti. Kjo sipas tij bëhet për të shmangur peticionin e mbledhur nga shoqëria civile me të cilin “kërkohet dhe adresohet përgjegjësia dhe dorëheqja e dy ministrave”.
“Vrasësin për Astritin mund ta identifikojmë lehtë pasi që Astriti ndodhej në institucion. Astriti vdiq jo nga shteti, por nga mungesa e shtetit“, tha Konjufca.
Shefi i deputetëve të PDK-së, Zenun Pajaziti, ka arsyetuar kërkesën e deputetëve nënshkrues për të diskutuar për vdekjen e Astrit, duke thënë se më parë nuk kanë përkrahur kërkesën e VV-së pasi kanë dashur të presin raportet.
Ai u bëri thirrje organeve të drejtësisë që të vazhdojnë hetimet dhe rasti të qartësohet deri në fund.
“Ne, sot, duam vetëm drejtësi dhe jo hamendje“, tha Pajaziti.
Beqiri akuzon VV se po keqpërdor rastin
Shefi i grupit parlamentar të LDK-së, Ismet Beqiri, ndërkaq, tha se askush nga deputetët “nuk duhet ta marrë rolin e gjykatësit”.
Ai tha se organet kompetente të drejtësisë kanë dhe duhet të kenë besimin e qytetarëve”.
Beqiri akuzoi Vetëvendosje-n se po e keqpërdor rastin Dehari për, siç tha, “përfitime politike”.
Ndërsa, shefi i grupit parlamentar të AAK-së, Pal Lekaj ftoi FBI-në për ta hetuar vdekjen e Deharit , deerisa tha se partia e tij refuzon të jetë pjesë e debatit pasi që nuk i kontribuon zbardhjes së të vërtetës.
“Seanca u thirr me arsyetim se është bërë jehonë mediale”
Valdete Bajrami nga NISMA për Kosovën ka thënë se për rastin në fjalë, dikush duhet të jap llogari dhe se përgjegjësit duhet të dalin në shesh.”
“Më vjen keq që nga deputetët thuhet se pasi që është bërë jehonë mediale, të thrrasim seancë. A do të thotë kjo që vetëm se është bërë jehona ne duhet të thërrasim seancë dhe duhet të diskutojmë një rast që ka përfunduar me fatalitet. Çka bëhet me rastet që nuk ka jehonë mediale? A duhet vetëm të bëhet tragjejia që ne të diskutojmë? Sinqerisht a keni pak ndjenja”, tha Bajrami.
Ministrja Hoxha, partive: Mos përfitoni politikisht
Ndërsa, shumë deputetë të opozitës kërkuan dorëheqjen e Hysenit dhe Hoxhës, kjo e fundit tha se ministria që drejton ka ndërmarr të gjitha vendimet e nevojshme për zbardhjen e rastit.
Ajo ka bërë thirrje që mos të dilet me deklaratë të ndryshme të cilat po e nxisin opinionin publik, derisa ka kërkuar që të mos tentohet të përfitohet politikisht nga ky rast tragjik.
Ndryshe, deputet të caktuar kanë shprehur bindjen se ky rast rrezikon të mos zbulohet asnjëherë dhe kanë shtruar pyetjet se si është e mundur për në një rast të caktuar të dyshuarve t’iu shqiptohen masa të ndryshme.
Ndërsa, ligjvënësit debatonin afër Kuvendit mbahej protesta e tretë e organizuar nga shoqëria civile në të cilën morën pjesë edhe Avni e Xhemile Dehari, prindërit e Astritit.
Ekspertët e mjeksësisë ligjore kanë konstatuar se “Dehari ka bërë vetëvrasje dhe vdekja e tij është shkaktuar nga asfiksia”, në anën tjetër ekspertët e propozuar nga familja kanë konstatuar që Dehari është vrarë.
Astrit Dehari, vdiq më datë 5 nëntor derisa po mbahej në qendrën e paraburgimit në Prizren si i dyshuar për sulmin ndaj Kuvendit të Kosovës.
Blendi Gashi – /tesheshi.com/
