Partia Demokratike e Kosovës (PDK) që udhëheqet nga Kadri Veseli është subjekti që më së shumti po “freskohet” me deputetë të rinj. Arsyeja është se disa prej deputetëve që kanë fituar mandate në zgjedhjet e fundit po detyrohen të japin dorëheqje nga pozita e ligjvënësit për shkak të përballjes me drejtësinë.
Pasi dorëzuan postin e deputetit kohë më parë, Rrustem Mustafa-Remi, Latif Gashi-Lata dhe Azem Syla, një gjë të tillë e ka bërë dje edhe deputeti Fadil Demaku, pasi që Gjykata e Apelit, konfirmoi dënimi prej tre vitesh burgim që ka dhënë Gjykata Themelore e Mitrovicës më 15 maj të vitit 2015 për rastin e njohur si “Drenica II”, për krime lufte.
Sigurisht vendi që do lë Demaku në parlament nuk do të mbetet i zbrazët. Ulësen e tij do ta zë një mjek nga qyteti i Ferizajt. Bëhet fjalë për Nehat Baftiun, i cili sipas listës së KQZ-së është i pari në listën e pritjes së PDK-së. Ai në zgjedhjet e fundit mori 8087 vota.
PDK-ja edhe pse mbetet pa një ushtarak nga Drenica, ajo përforcohet me një ish luftëtarë të UÇK-së nga Ferizaji, njëherit me një mjek anesteziolog të njohur që u doli në ndihmë që në ditët e para ushtarëve të UÇK-së dhe civilëve të plagosur gjatë luftës së fundit.
Po kush është Nehat Baftiu, deputeti më i ri i PDK-së?
Ligjvënësi më i ri kosovar, vjen nga rajoni i Ferizajt. Me profesion është mjek anesteziolog.
Baftiu, ndoshta si pak tashmë koleg të tij deputet më parë nuk është marrë me politikë, por që ka mbajt pozita të larta që kanë të bëjnë me fushën e mjekësisë.
Në muajin janar të vitit 2012 është emëruar drejtor i Klinikës së Anesteziologjisë dhe Reanimacionit në qendrën Klinike Universitare të Kosovës.
Më herët ka mbajtur edhe disa pozita të tera si; pozitën e kryetar të Komitetit specialistik për anesteziologji dhe reanimacionit, ka qenë anëtari i Odës së mjekëve të Kosovës, anëtar i Këshillit shkencor të fakultetit të mjekësisë dhe anëtar i Shoqatës kosovare të anestezioligjisë.
Fakultetin e Mjekësisë e kreu në Universitetin e Prishtinës, ku fitoi gradën Doktor i Mjekësisë. Më 1996 , përfundoi me suksese specializimin në lëminë Anesteziologjisë dhe Reanimacioni në qendrën spitalore “Nëna Terezë” në Tiranë. Shkallen e tretë dhe titullin magjistër i Shkencave të mjekësise e mori më 2002 në Universitetin e Prishtinës, kurse studimet e doktoratës i përfundoi më 2005 në Universitetin Tiranës.
Në periudhen 2005-2007, përfundon poashtu shkallën e tretë për menaxhment shëndetësor.
Baftiu, ka botuar dhe mbrojtur 54 punime shkencore në revista dhe konferenca Kombëtare dhe ndërkombëtare.
Është i martuar , ka 4 fëmijë të gjithë të orientuar në lëminë e shëndetësisë.
Përgatiti: Blendi Gashi – /tesheshi.com/
