Deputetët e parlamentit të Jemenit janë mbledhur për herë të parë për një seancë parlamentare që kur husinjtë dhe aleatët e tyre e morën kryeqytetin Sana dy vite të shkuara.
Nën masa të rrepta sigurie, në seancën e kësaj të shtune morën pjesë 140 parlamentarë, ndërkohë që parlamenti ka 301 vende.
Presidenti Abdurrabu Mansur Hadi e quajti të paligjshme seancën, duke paralajmëruar procedimin e parlamentarëve që morën pjesë në të.
Bisedimet e mbështetura nga OKB-ja midis qeverisë së Jemenit dhe husinjve nuk kanë sjellë rezultatin e dëshiruar, me konfliktin që vijon të mbetet pa zgjidhje. Pasi këto bisedime u pezulluan javën e shkuar, husinjtë dhe mbështetësit e ish-presidentit të vendit shpallën formimin e një këshilli politik për drejtimin e vendit.
Jemeni u përfshi nga konflikti civil në vitin 2014, kur shiitët husinj dhe forcat aleate të ish-presidentit Ali Abdullah Salih vërshuan në Sana dhe në provincat e tjera të vendit, duke e detyruar presidentin Abdurrabu Mansur Hadi dhe qeverinë të largohej për në Riad. Në mars të vitit të kaluar nisi një fushatë ushtarake e udhëhequr nga Arabia Saudite, me synimin për t’i zmbrapsur husinjtë dhe për ta kthyer në detyrë qeverinë legjitime. /tesheshi.com/
