Ligjvënësit hungarezë kanë miratuar një ligj që e autorizon qeverinë të dislokojë forcat ushtarake për mbrojtjen e kufijve, duke përfshirë dhe përdorimin e armëve jovdekjeprurëse.
Sipas ligjit, ushtria do të lejohet të përdorë mes të tjerash plumba gome dhe granata me gaz lotsjellës.
Ligji pati 151 vota në favor të tij, ndërsa 12 parlamentarë votuan kundër e 27 abstenuan.
Fidesz, partia në pushtet e qendrës së djathtë, e kryeministrit Viktor Orban, pati në votim mbështetjen e Jobbik-ut, partisë nacionaliste radikale, që edhe më herët pati kërkuar masa më të ashpra.
Hungaria është prej vendeve më të prekura nga vala e refugjatëve, dhe prej kohësh është në qendër të vëmendjes për shkak të trajtimit që u ka rezervuar atyre. Por ashtu si vendet ballkanike, dhe Hungaria është një vend tranzit për refugjatët, shumica e të cilëve kanë si objektiv përfundimtar Gjermaninë.
Pas mbylljes së rrugëve kufitare me Serbinë, Hungaria përfundoi të shtunën dhe ndërtimin e një pengese prej 41 kilometrash në kufirin me Kroacinë. /tesheshi.com/
