Shkurtime të tjera buxhetore dhe rritje taksash janë miratuar dje nga parlamenti grek. Ndërsa 10.000 protestues ngrinin zërin jashtë godinës së parlamentit kundër reformave jopopullore, masat e reja ligjore merrnin aprovimin në parlament me votën pro të 153 deputetëve të koalicionit të Syriza-s.
Miratimi i një legjislacioni të tillë vjen dy ditë përpara një takimi të ministrave të Financave të Eurozonës në Bruksel, ku priten të zhbllokohen fondet e paketës së ndihmës financiare.
“Udhëheqësit europianë marrin mesazhin se Greqia po u përmbahet premtimeve të veta. Tani është radha e tyre,” do të deklaronte kryeministri grek, Aleksis Cipras, para votimit.
Veç shkurtimeve buxhetore e rritjes së taksave, legjislacioni i miratuar dje parashikon dhe krijimin e një fondi shtetëror privatizimi, të kërkuar nga ministrat e Financës së Eurozonës.
Parlamenti grek do të kalonte më herët këtë muaj reformën e pensioneve dhe të sistemit së taksës së të ardhurave.
Partitë opozitare do të shpreheshin kundër masave të reja shtrënguese. Udhëheqësi i Demokracisë së Re, Kiriakos Micotaqis, paralajmëroi se askush në Greqi nuk do të mbetej i paprekur nga “tajfuni” i masave të reja.
Greqia po përpiqet të negociojë një ndihmë të re për një pagesë borxhi prej 3.5 miliardë eurosh në dy muajt e ardhshëm.
E përditshmja financiare gjermane Handelsblatt ka bërë të ditur se Greqia mund të sigurojë nëntë gjer në 11 milionë euro nëse gjatë kësaj jave do të ketë një marrëveshje. /tesheshi.com/
