Marrëveshja mes BE-së dhe Turqisë për kthimin e emigrantëve mund të nisë të zbatohet që të hënën, pasi ligjvënësit grekë e miratuan dje ligjin e nevojshëm që i lejon të ardhurit të kthehen në tokën turke.
Ligji u miratua me votat pro të 169 parlamentarëve, dhe hap tashmë dritën jeshile për kthimin e emigrantëve.
Sipas marrëveshjes së BE-së dhe Turqisë, emigrantët që arrijnë ilegalisht në Greqi do të kthehen në Turqi nga 4 prilli nëse nuk aplikojnë për azil ose në rast se kërkesa e tyre hidhet poshtë.
Me këtë marrëveshje synohet t’i jepet fund vërshimit të pakontrolluar të refugjatëve dhe emigrantëve drejt Europës.
Shenjat e para janë pozitive, teksa numri i të mbërriturve në ishujt grekë gjatë javës së shkuar ka rënë në mënyrë të konsiderueshme.
Të hënën do duhet që Turqia të nisë të presë emigrantët e parë të kthyer nga Greqia. Raportimet e fundit flasin për mungesë përgatitje nga të dyja vendet. /tesheshi.com/
