Parlamenti grek votoi pro paketës së reformave, pjesë e marrëveshjes së shpëtimit financiar të dakordësuar në Bruksel nga kryeministri Cipras, pas një debati të gjatë e me tone të ashpra.
Masat e kursimit kanë marrë votën “po” të 229 deputetëve, 64 kanë votuan kundër dhe 5 deputetë abstenuan. Më shumë se 30 deputetë të partisë Syriza votuan kundër reformave.
Secili deputet u thirr për të votuar nominalisht në përfundim të debatit të ndezur në parlament. Janis Varufakis, ish-ministri i dorëhequr i Financave, votoi ndër të parët dhe vota e tij ishte “jo”.
Kjo nisje nuk ishte e mirë për Cipras që ka humbur mbështetjen e deputetëve të vet të partisë së radikalëve të majtë.
Por, pavarësisht revoltës së deputetëve të Syriza-s, nga ndjekësit e vijës së ashpër, paketa e reformave u miratua. Mes rebelëve ishte edhe kryetarja e Parlamentit, Zoe Constantopoulo, e cila u largua përpara se të votohej, por më pas u rikthye në sallë për të mbajtur një fjalim të ashpër ku dënoi atë që e cilësoi “një ditë shumë të zezë për Demokracinë në Europë”.
Debatet nuk kanë pushuar deri në momentin e fundit, ndërsa afati i orës 22 00 me kohën lokale nuk u mor parasysh.
Lideri i Opozitës, kreu i ri i partisë Demokracia e Re, Meimarakis e kishte deklaruar në mbyllje të debatit votën po për paketën, votë që e cilësoi të pakushtëzuar. 76 votat e partisë së tij ishin kritike për rezultatin.
Para se të niste votimi, kryeministri Cipras apeloi për herë të fundit deputetët të mbështesin paketën. “Ne kemi lënë një trashëgimi dinjiteti dhe demokracie. Ne kemi mbjellë farën që do të japë frute në Euopë dhe në Greqi”, tha ai.
“Merreni këtë vendim me përgjegjësi”, ishte apeli i Cipras i cili shtoi se “ne nuk besojmë në shumicën e këtyre masave, por ishim të detyruar t’i pranonim”. Sipas Cipras, ai nuk beson se masat do të japin përfitime për ekonominë, duke shtuar se Greqisë i nevojitet një ristrukturim i borxhit. Megjithatë, ai ka shtuar se marrëveshja e re edhe pse me masa të ashpra, hap perspektivën për ta nxjerrë më shpejt Greqinë nga kriza.
Tensionet u shtuan në sallën e parlamentit në momentin kur fjalën e mori ish-ministri i Financave, Janis Varoufakis. Ai u prit me thirrjet: Ti na solle këtu!”.
Britmat u shtuan ndërsa ai tha se kishte dyshime për marrëveshjen, nëse ajo do të funksionojë dhe e krahasoi atë me kushtet e imponuara Gjermanisë në Traktatin e Versajvës pas Luftës së Parë Botërore.
Ndërkaq, deputetët francezë miratuan pasdite marrëveshjen. Gjermania voton sot.
Votimi pro i parlamentit grek është vetëm parakushti për nisjen e negociatave të ashpra me kreditorët. /tesheshi/
