Vendosja e gjendjes së jashtëzakonshme në Egjipt kaloi dhe hallkën e fundit, atë të miratimin në parlament.
Votimi i djeshëm në parlament i hapi përfundimisht rrugën gjendjes së jashtëzakonshme në tërë vendin, tashmë në fuqi për tre muajt në vijim.
Në faqen zyrtare elektronike të parlamentit egjiptian thuhej se miratimi nga shumica i gjendjes së jashtëzakonshme i lejon forcat ushtarake dhe policore të marrin masat e duhura për t’u përballur me terrorizmin dhe financimin e tij, si dhe për të mbrojtur qytetarët dhe institucionet.
Më herët se kaq, të hënën, ishte qeveria egjiptiane ajo që miratoi gjendjen e jashtëzakonshme, duke shpallur hyrjen në fuqi prej mesditës së asaj dite.
Gjendja e jashtëzakonshme në Egjipt vendoset pas shpërthimeve të së dielës në dy kisha në Tanta dhe në Aleksandri, prej nga humbën jetën mbi 40 persona dhe u plagosën më shumë se 100 të tjerë.
Bastisjet, ndalimet, ndalimqarkullimet dhe kufizimet në media janë mes masave që bëhen të mundura përmes gjendjes së jashtëzakonshme. /tesheshi.com/
