PD dha votën pro zgjatjes së vettingut, duke marrë në këmbim dy komisione, atë të reformës territoriale dhe zgjedhoren.
Qartazi iu nënshtrua presionit ndërkombëtar për këtë rast, ku më pas i duhet ta përligjte si akt, pasi nga ana tjetër, Berisha i nxorri një video të Çadrës ku e sulmonte ashpër vettingun, duke e quajtur “projekt mafioz” të Ramës.
“Edi Rama, komploti është zbuluar. Projekti i vettingut është një projekt mafioz ku janë përfshirë diplomatë të lartë në Tiranë për llogari të Edi Ramës dhe kanë marrë peng ekspertë të BE-së. Bashkëkomplotistët e t’u janë dekonspiruar dhe i pret gjykimi në institucionet ndërkombëtare…”, do thoshte Basha.
Dhe i ra si barrë të besuarit të tij më të afërt, Alibeajt, për ta arsyetuar votën pro, pra ndryshimqëndrimin ndaj vettingut. Alibeaj tha se kjo u bë “pa asnjë dridhje qerpiku”.
“Ne vendosëm të votonim pro, pa asnjë lloj dridhje qerpiku”, tha Alibeaj, që më pas vijoi arsyetimin:
“E di, e di shumë mirë, se që sot, nesër, pasnesër, banaqet televizive, media të sponsorizuara, njerëz, do të thonë: çfarë bëtë juve? Bashkuat votën dhe gëlltitët atë çfarë keni thënë në këtë kohë? Po doni personalisht edhe e pranojmë. Por mbi të gjitha interesi
publik është ai që duhet të prevalojë. Sepse kishim disa teste morale që gjithsecili prej nesh duhet ta kishte kaluar”, u shpreh Alibeaj.
Sipas tij, ishte e nevojshme dhe dhënia e një prove që opozita nuk është kundër Reformës në Drejtësi.
“Na ka përndjekur kjo ideja që ne jemi kundër Reformës në Drejtësi. Nuk kemi qenë asnjëherë kundër Reformës në Drejtësi. Absolutisht. Frika ka qenë e madhe dhe është vërtetuar që Reforma në Drejtësi do të kapej, drejtësia do të kapej politikisht. Ka ndodhur! Ai që ishte gabimi ynë, është që ramë në këtë kurth psikologjik, që u shndërruam në sytë, jo vetëm të publikut, por edhe të ndërkombëtarëve si pengues. Jo nuk jemi pengues. Shembulli është ky sot. Me kosto, absolutisht me kosto. E dimë që nesër, pasnesër, deri më 6 mars, ata të cilët janë në fushën e betejës, do ta përdorin këtë kundër nesh”, theksoi Alibeaj. /tesheshi.com/
