Partia Demokratike ka akuzuar ditën e sotme kreun e Bashkisë së Tiranës, Erion Veliaj, se po bën një ndërtim të paligjshëm brenda Parkut të Liqenit për interesa klienteliste dhe korruptive.
“Është kafja dhe restoranti që do ia japë mikut të tij, arsyeja kryesore pse Erion Veliaj po ndërhyn në Parkun e Liqenit. Kryetari i Bashkisë përpiqet ta fshehë këtë, me propagandë bajate sikur ai dhe vetëm ai mendon për fëmijët e qytetit. E vërteta është se ai po mendon për klientelën dhe përfitimet e tij”,- tha Jorida Tabaku nga selia e PD-së.
Ajo shtoi se Veliaj ka parashikuar ndërtimin e objekteve të shërbimit që janë kafe, restorant, kioske për gazetat, ndërsa tha se e gjithë skema e tij ka qenë jo transparente.
“Kjo aferë ka dhe kosto financiare përveç të tjerash, me faturë 500 mijë euro nga taksat e banorëve të Tiranës. Qytetarët e Tiranës dhe Partia Demokratike janë të vendosur të mos e lejojnë këtë paligjshmëri dhe sipërmarrje klienteliste të Erion Veliajt. Parku i Liqenit nuk është oborri privat i kryetarit të Bashkisë. Është pasuri e qytetarëve dhe e tillë do të mbetet”, – përfundoi Tabaku. /tesheshi.com/
