Francezët votojnë të dielën në zgjedhjet presidenciale, më kritiket në suazën e një Bashkimi Europian në telashe. E pikërisht në këtë moment, në qendër të Parisit ka gjakderdhje.
Një sulm në orët e mbrëmjes të së enjtes në “Champs Elysees” la të vdekur një punonjës policie e dy të tjerë të plagosur përpara se vetë agresori të qëllohej për vdekje.
Menjëherë pas ngjarjes nisi një hetim për terrorizëm, ndërkohë që televizionet franceze lajmëruan se i dyshuari për sulmin ishte një shtetas francez 39-vjeçar i njohur dhe më herët për krime të dhunshme.
Policia mësohet të ketë lëshuar një urdhër arrestimi për një person të dytë. Prokurori i Parisit, Francois Molins, u deklaroi gazetarëve se, “Identiteti i agresorit është i njohur dhe është verifikuar.”
Përgjegjësinë për sulmin e ka marrë ISIS-i, që nëpërmjet një deklarate ka bërë të ditur se agresori ishte një prej luftëtarëve të tij.
Rrjeti informativ Al Jazeera, një ndjekës nga afër i zhvillimeve, pohon se nuk ka qenë e mundur për të që ta vërtetojë në mënyrë të pavarur deklarimin e mësipërm.
Pak ditë para zgjedhjeve presidenciale, sulmi i shkon për shtat retorikës së Marine Le Pen-it. Udhëheqësja e Frontit Nacional, përfaqësuese e ekstremit të djathtë, ka përdorur një gjuhë të ashpër gjatë gjithë fushatës elektorale, me ngjyra ksenofobe e islamofobe, e madje ka premtuar dhe pezullim të plotë të emigracionit të ligjshëm. Ekstremistja sugjerohet të ketë sukses në raundin e parë të zgjedhjeve dhe të jetë një prej dy kandidatëve në balotazh.
Pikë nga ky sulm mund të fitojë gjithashtu dhe Francois Fillon, kandidati i qendrës së djathtë në zgjedhjet presidenciale.
Si Marine Le Pen dhe Francois Fillon janë nën hetim për afera korruptive. Sido që të jetë, ngjarja më e fundit besohet se do të ketë ndikim në votën e së dielës për zgjedhjet presidenciale, më të paparashikuarat në Francë në dekadat e fundit. /tesheshi.com/
