Gati 1.500 njerëz janë evakuar nga shtëpitë në rajonin e Parisit, ndërkohë që autoritetet që janë vënë në gjendje gatishmërie për çdo rrezik të madh nga vërshimet, pas rritjes së nivelit të lumit të Senës të dielën.
Michel Delpuech, kreu i policisë së Parisit, u tha gazetarëve se rreth 1,500 njerëz janë larguar nga shtëpitë në rajonin e Ile de France, që përbëhet nga kryeqyteti francez dhe rrethinat e tij.
Ujërat e Senës pritet të arrijnë pikun natën e së dielës ose mëngjesin e të hënës në afërsi të niveleve që çuan në përmbytje të ngjashme në 2016, thanë autoritetet.
Kati i poshtëm i muzeut të Luvrit, disa parqe parizienë dhe stacionet e trenave të lumenjve u mbyllën si një masë paraprake.
Përmbytjet kanë ndërprerë trafikun e anijeve në Paris, kanë mbyllur rrugët dhe shkollat dhe kanë nxitur evakuimin e spitaleve.
Anijet turistike “Bateaux Mouches” të Parisit janë mbyllur për shkak të ujërave të larta, ndërsa mjellmat janë parë duke notuar aty ku zakonisht janë trotuaret dhe minjtë janë detyruar të dalin në rrugë.
Kryebashkiaku i Parisit, Anne Hidalgo shkroi të dielën se “situata është relativisht nën kontroll”, por ajo kërkoi vigjilencë dhe ndryshime në planifikimin e qytetit për t’u përshtatur me një numër në rritje të ngjarjeve ekstreme të motit.
Më shumë se 240 qytete përgjatë Senës dhe lumenjve më të vegjël kanë pësuar dëme.
Në vend të makinave, mjellmat dhe kanoet zunë rrugët të dielën në qytetin Villennes-sur-Seine në perëndim të Parisit.
Përmbytjet shkaktuan shkatërrime në Paris në vitin 1910 kur Sena u rrit me 8,65 metra, edhe pse nuk u regjistruan viktima. /tesheshi.com/
