Atë që deri dje bënin të tjerët me Arben Ahmetajn si ministër finance, të njëjtën bëri ky i fundit me pasardhësen e tij Anila Denaj.
Në pozitën e kreut të komisionit të ekonomisë si pasardhës i Braçes, siç jepte llogari para atij që sot është nr.2 i qeverisë mbi koston e disa rrugëve, Ahmetaj, jo për rrugët por për buxhetin, e ka vënë në vështirësi gruan që e pasoi në detyrë, duke i kërkuar llogari mbi buxhetin.
Ç’emër ka buxheti – ishte pyetja sfiduese e Ahmetajt ndaj bashkëpartiakes së tij, duke bërë kështu opozitën e munguar, e cila ndodhet prej muajsh jashtë sistemit.
Kryetari i Komisionit të Ekonomisë, Arben Ahmetaj ka patur kundërshti pas prezantimit të Buxhetit 2020 nga ministria e Financave. Arben Ahmetaj ka theksuar se është e pajustifikueshme parashikimi i investimeve për vitin e ardhshëm.
“Ky buxhet ka ardhur pa një parashikim që buxheti i kujt sektori është; pra i infrastrukturës, i bujqësisë, i pagave apo i pensioneve. Do e diskutojmë a do ketë rritje pagash, pasi këtu nuk e kemi? Buxheti është pa një emër konkret. Të ardhurat nga tatimet dhe doganat kanë rënë nga 18.7 në 18.4% të Prodhimit të Brendshëm Bruto. Ministria e Infrastrukturës duhet të paguaj 6.2 miliardë lekë detyrime të prapambetura që ka. Unaza e Tiranës merr pjesën më të madhe të buxhetit të Ministrisë së Infrastrukturës dhe pjesa tjetër infrastrukturore nuk merr asgjë”, ishin kritikat e Ahmetajn, siç dhe ai vetë ballafaqohej me to dikur kur drejtonte financat.
Nga ana e saj, ministrja Denaj renditi arsimin si prioritar, referuar faktit se kishte buxhet të shtuar për të.
“Në Arsim 3.3 miliard lek më shumë. Arsimi është sektor ku u rrit në mënyrë të ndjeshme. Investim në arsim dy herë më tepër se një vit më parë”, tha Denaj.
Ndërsa te infrastuktura, renditi disa rrugë që do përfundojnë sipas sa në dy vite. ” Në infrastrukturë brenda 2022 synohet të përfundojnë këto projekte të mëdha: Rruga Arbrit, Milot- Balldren, Orikum-Dukat, Kardhiq – Delvinë, një pjesë e Unazës së Tiranës, Elbasan -Banjë e Baypass Fier”, tha ministrja Denaj. /tesheshi.com/
