Kreut demokrat Lulzim Basha do i duhet të përballet në gjykatë, pasi dosja hetuese e një transferte parash për lobim nga PD, ka përfunduar e duhet tashmë të çohet për gjykim. Në media ka dalë kërkesa që prokurorët të cilët hetuan transfertën e dyshimtë në kanale ruse të mbi 670 mijë dollarë, kërkojnë marrjen si të pandehur të Bashës. Por akuza nuk është ajo e “Pastrimit të produkteve të veprës penale ose veprimtarisë kriminale”, ka rënë. Basha akuzohet vetëm për “Falsifikimi i vulave, i stampava ose i formularëve”.
“I pandehuri: Lulzim Basha, i biri i Xhelal dhe i Remzije, i ditëlindjes 12.06.1974, lindur dhe banues në Tiranë, pallati afër ish-Hotel Sheraton, me gjendje civile i martuar, me shtetësi shqiptare, me gjendje gjyqësore i pandehur, hetuar pa masë sigurimi, mbrojtur nga avokat Ivi Kaso, me numër license 3180. Akuzuar se ka kryer veprën penale të “Falsifikimi i vulave, i stampava ose i formularëve” dhe të “Pastrimit të produkteve të veprës penale ose veprimtarisë kriminale”, të parashikuar në nenet 190/3 dhe 2870ç/2 të Kodit Penal”- thuhet në dokumentin e prokurorisë.
Çështja nisi kur më 14 nëntor 2017, “Stonington Strategies” raportoi në Departamentin e Drejtësisë se ka marrë dy pagesa nga Partia Demokratike me vlerë totale 500 mijë USD dhe një pagesë të tretë nga “Biniatta Trade LP” në vlerën e 150 mijë USD. Asnjëra prej këtyre pagesave nuk rezulton e deklaruar në raportin financiar të dorëzuar nga PD në Komisionin Qendror të Zgjedhjeve për zgjedhjet e 25 qershorit.
Kjo është hera e dytë në karrierën politike që Basha thirret në gjykatë pasi ngritjes së akuzave të prokurorisë ndaj tij. Më herët, në kushtet e të qënit në pushtet, më saktë ishte ministër i Transporteve, ndaj tij u ngrit akuza e abuzimit me mbi 200 mijë euro në Rrugën e Kombit. Por Basha iu shmang gjykimit në një gjetje proceduruale. /tesheshi.com/
