Numri i refugjatëve dhe migrantëve që po drejtohen në Evropë këtë vit ka të ngjarë të rritet për shkak të pandemisë së koronvirusit, parashikon Instituti i Politikave të Migracionit ICMPD.
Një kujdes më i mirë shëndetësor dhe disponueshmëria e vaksinave në Evropë dhe kriza ekonomike globale e shkaktuar nga pandemia, pritet të nxisin migrim më të madh në Bashkimin Evropian, tha për Handelsblatt, Michael Spindelegger, drejtori i Qendrës Ndërkombëtare për Zhvillimin e Politikave të Migracionit me bazë në Vjenë.
“Në BE, njerëzit marrin vaksina falas. Kjo është shumë tërheqëse për refugjatët nga Afrika, Amerika Latine dhe Azia. Prandaj, ne presim një rritje të imigracionit të paligjshëm,” shtoi Spindelegger, i cili ishte gjithashtu zv / kancelar i Austrisë dhe ministër i Jashtëm.
“Perspektivat ekonomike janë të dobëta në shumë vende. Prandaj, ne presim që presioni për të emigruar të rritet,” parashikoi ai.
Ekspertët e ICMPD thonë se ata kanë vërejtur shfaqjen e rrugëve të reja të migrimit në Evropë, të tilla si ato nga Libani në Qipro ose nga Mauritania në Ishujt Kanarie.
Numri i migrantëve që lëvizin në këto drejtime është rritur me 900 përqind, sipas Institutit të Vjenës. Në Mesdheun qendror, përmes Tunizisë, numri i migrantëve u rrit me 155 përqind vitin e kaluar.
Spindelegger gjithashtu tha se ai pret një rritje të migrimit nga Amerika Latine kur të rivendosen lidhjet ajrore sepse rajoni është ekonomikisht shumë më i goditur nga kriza sesa Bashkimi Evropian.
ICMPD u themelua në vitin 1993 nga Austria dhe Zvicra dhe tani ka 18 vende evropiane si anëtare. /tesheshi.com/
