Portali rus Sputnik, thekson se nëse serbët e Kosovës do të votonin të gjithë, atëherë ata do të ishin forca e dytë në Parlamentin e Kosovës me 30 deputetë.
Dhe siç duket negociatat e ardhshme ndërmjet Prishtinës dhe Beogradit pikërisht këtu do të synojnë.
Llogaria që bën Sputnik është e tillë: Nga Kosova janë larguar 250 mijë serbë, nëse 100 mijë prej të cilëve kanë të drejtë vote, ata do të kenë afërsisht të njëjtin numër votash siç ka vetëvendosja apo LDK sot.
Sputnik shton më tej se serbët nuk votojnë dot për dy arsye: “E para nuk kanë dokumente të Kosovës, pasi nuk e pranojnë si shtet dhe e dyta, nuk votojnë dot atje ku e kanë regjistrimin.
Serbët që votojnë, e bëjnë këtë vetëm në 3 komunat e veriut dhe në disa enklava në Perëndim dhe në qendër të Kosovës”.
Sipas ligjit për zgjedhjet në Kosovë, kanë të drejtë të votojnë vetëm ata serbë, të cilët kanë pasur letërnjoftimin e UNMIK-ut, pra ata që kanë lindur në Kosovë dhe kanë jetuar në territorin e Kosovës deri në vitin 1999.
Sputnik bën të ditur se janë rreth 100,000 serbë që e morën dokumentin e UNMIK-ut.
Nenad Rikalo, anëtar i Komisionit Qendror të Zgjedhjeve të Kosovës, i tha Sputnik-ut se “nga Serbia kanë ardhur rreth 4 mijë aplikime shtesë nga shtetasit.
Serbët e Kosovës që jetojnë në Serbi dhe që kanë letërnjoftimin e UNMIK-ut, megjithatë mund të votojnë nëse ushtrojnë të drejtën e votimit për diasporën, por vetëm nëse njohin shtetësinë e Kosovës dhe plotësojnë formularin në mënyrë të duhur.
Por ata kanë një pengesë, jetojnë në Serbi, vend që nuk e njeh shtetin e Kosovës dhe si e tillë nuk ka ambasadë apo konsullatë të Kosovës.
Por në Beograd ka ambasadë të Shqipërisë dhe sipas marrëveshjes mes Tiranës dhe Prishtinës, ambasadat dhe konsullatat e Shqipërisë mund të përdoren edhe si seli diplomatike të shtetit të Kosovës.
Një fakt interesant publikon Sputnik, që 1.119 formularë nga serbët e Kosovës që jetojnë në territorin e Republikës së Serbisë kanë votuar në distancë.
Por kjo nuk bëhet e ditur nëse ata e kanë ushtruar të drejtën e votës në ambasadën shqiptare në Beograd, apo kanë shkuar në veriun e Kosovës për të votuar.
Dushan Radenkoviç, një aktivist i shoqërisë civile në Kosovë, thekson për Sputnik se “nëse do të ishte e mundur të votojnë të gjithë serbët e larguar nga Kosova, dhe të votonin për një parti të tyre, ata sot do të kishin 30 deputetë, pra automatikisht do të ishin parti e dytë”.
Sputnik shkruan se nga viti 1999 nga Kosova janë zhvendosur më shumë rreth 250.000 serbë, ndërkohë sot në Republikën e Kosovës jetojnë rreth 25.000 pjesëtarë të pakicës serbe, të cilët kanë 10 vende të rezervuara në Parlament.
/tesheshi.com/
