Organizata e Vendeve Eksportuese të Naftës (OPEC) ka rritur vlerësimet e saj afatmesme dhe afatgjata të kërkesës për naftë, duke theksuar nevojën për investime më të mëdha në sektorin e naftës për të përmbushur kërkesën e pritur, raporton Reuters.
Në raportin për tregun e naftës në vitin 2022, OPEC paralajmëroi për një mungesë kronike investimesh, duke vlerësuar se sektori i naftës duhet të investojë 12.1 miliardë dollarë për të përmbushur kërkesën më të lartë të pritur në afat të mesëm dhe afatgjatë.
Në vitin e ardhshëm, kërkesa botërore për naftë, siç tregohet nga projeksionet e përmirësuara, do të arrijë në 103 milionë fuçi në ditë, që është një rritje prej 2.7 milionë në krahasim me vitin 2022.
Kështu, OPEC rriti vlerësimin e vitit të kaluar për vitin 2023 me 1.4 milionë fuçi në ditë.
Parashikimi i rritur pasqyron një rimëkëmbje më të fortë në 2022 dhe 2023 dhe një “përqendrim të fortë në çështjet e sigurisë së energjisë”, duke çuar në një zëvendësim më të ngadaltë të naftës me lëndë djegëse të tjera si gazi natyror, çmimi i të cilit është rritur për shkak të pushtimit rus të Ukrainës.
OPEC ka rritur edhe parashikimet e kërkesës për periudhën afatmesme, deri në vitin 2027, kur duhet të jetë gati dy milionë fuçi në ditë më e lartë krahasuar me vitin e kaluar. Deri në vitin 2030, ajo duhet të arrijë mesatarisht 108.3 milionë fuçi në ditë.
Një kthesë e madhe në një vit pandemik
Parashikimi afatgjatë, për periudhën deri në vitin 2045, u rrit në 109.8 milionë fuçi në ditë, nga 108.2 milionë fuçi në ditë në vitin 2021.
Vitet e fundit, grupi ka reduktuar projeksionin e tij afatgjatë të kërkesës.
OPEC bëri një kthesë të madhe në vitin pandemik të 2020, duke parashikuar që kërkesa do të ngadalësohet përfundimisht, pas vitesh parashikimi të rritjes së saj gjithnjë e më të fortë.
Në raportin e fundit, karteli megjithatë këmbëngul në vlerësimin se kërkesa botërore do të fillojë të bjerë pas vitit 2035. Kompanitë dhe bankat parashikojnë se do të arrijë kulmin përpara vitit 2035.
Ndërkohë, OPEC dhe aleatët e tij planifikojnë të ulin furnizimin përsëri në nëntor për të mbështetur çmimet.
Furnizimi do të ulet edhe në periudhën afatmesme, tregon raporti. /tesheshi.com/
