Dënimi i Skënderbeut nga UEFA i dha mundësi skuadrës kryeqytetase të Partizanit të kthehet të luajë pas më shumë se dy dekadash një ndeshje në Champions League.
Të kuqtë kishin për kundërshtar mbrëmë në “Elbasan Arena” skuadrën e njohur hungareze të Ferencvaroshit. Ishte një sfidë për turin e dytë paraeliminator të Champions League-s, e para nga të dy përballjet.
Partizani kishte një numër të konsiderueshëm mbështetësish në shkallët e stadiumit të Elbasanit, që i dhanë zemër skuadrës në çdo çast.
Partizani do të tregohej më këmbëngulës në pjesën e parë, por të pakta do të ishin ngacmimet në portat respektive. Eshtë minuta e 47-të kur stadiumi do të ndizet nga goli i Filit. Futbollisti i Partizanit ka goditur në ecje e sipër nga jashtë zonës, duke shënuar një gol të mrekullueshëm.
Një tjetër rast do të pasonte për Partizanin, por që fatkeqësisht nuk u shfrytëzua siç duhet. Hungarezët thirrën në ndihmë përvojën e tyre, dhe Böde i barazoi shifrat në minutën e 71-të. Goli i të sapofuturit në lojë ishte thjeshtësisht i shmangshëm, por lojtarët e Partizanit u treguan të pavëmendshëm.
Barazimi 1-1 do të mbetej në fuqi gjer në fund, për ta lënë për zgjidhje çështjen e kualifikimit për në takimin e dytë, që do të zhvillohet në Hungari pas një jave.
Partizani ka përpara një detyrë shumë të vështirë, duke patur parasysh historinë dhe traditën e Ferencvaroshit, por gjithsesi jo të pamundur. /tesheshi.com/
